2017年07月13日

澳洲 甜品 飛車 BBQ

blog11

 

係澳洲嘅公路,每一個可以入去休息同食嘢嘅地方,都總會有間麥當奴。成條公路充斥住麥當奴,真係見到都唔想食。

 

由墨爾本返悉尼途中,去到Yass Service Centre見到有KFC,諗住終於可以轉下口味。點知我開心得太早,加上我真係好早去到,佢要10點半先開門,咁被迫又要再食麥當奴早餐。

 

 

食緊麥當奴早餐嘅時候,係好懷念日本嘅公路,佢地嘅休息站真係又多嘢食又多嘢買。

 

更多照片: https://www.facebook.com/pg/drivingtour/photos/?tab=album&album_id=1465021706842827

 

公路兩旁不時會見到酒莊同果園嘅指示牌,我要揸車就無謂去酒莊有得睇無得飲啦!咁啱係其中一個rest stop,見到有果園嘅車泊左係到賣生果,我都埋去支持下。

 

 

唔係淨係煎炒煮炸先叫美食車,好似呢架咁成車新鮮水果,都係一架美食車。

 

blog11.1

Youtube: https://www.youtube.com/watch?v=zJBJ1-kGRSE 泥路飛車影片

 

返到悉尼會合左朋友之後,就走左去位於Blue Mountains National Park入面嘅Red Hands Cave。係Glenbrook開車入去過左遊客服務中心之後就係窄窄嘅山路,加上彎彎曲曲嘅泥路,開車嘅時候要加倍小心。

 

 

開到盡頭就係Red Hands Cave停車場,落車行大約15-20分鐘,就到達Red Hands Cave遺址。可以見到石頭上面印左好多手掌印,係古代人留底嘅記錄。不過感覺有點恐怖,好似一班人被困係石頭入面,不斷呼救。

 

 

行完山出返嚟,係Glenbrook見到一間環境好舒服嘅餐廳2773,就入去坐下食個下午茶。餐廳有款好邪惡嘅甜品,叫The Killer Shakes有三種味道Magnum﹝朱古力﹞, Blue Steel﹝薄荷﹞, Ferrari﹝士多啤梨﹞,最底層係奶昔,上面有甜麵包、雪榚同埋不同嘅裝飾品,如果叫Magnum會有埋支朱古力脆皮雪條。

 

 

最後一晚係悉尼,朋友帶我去左位於Rowe St.嘅Welcome BBQ食韓國燒烤,呢條街當地人叫佢做韓國街。好多韓國餐館都係Rowe St.經營,坐鐵路係Eastwood站落車就到啦!泊車就麻煩少少,係開餐嘅煩忙時間要搵個合法車位泊車都唔容易,所以時間要預得鬆動啲啦!

 

 

係Welcome BBQ我推介大家試下佢嘅Aged Kimchi同埋蒸水蛋,Aged Kimchi係老闆自家制作,味道比較重比較濃,有別於一般大家係香港食到嘅味道。而呢個韓式蒸水蛋入口好滑,好似食緊棉花糖,有一種似無帶有嘅感覺。

 

 

食飽就返Motel執嘢,聽朝早機返香港。

 

2017年2月25及26日

2017年澳洲自駕遊﹝11﹞

Read More
2017年06月29日

墨爾本Federation Square泊車小貼士

blog10

 

開車嚟到墨爾本,我上午去左參觀澳洲當代藝術中心ACCA (Australian Centre for Contemporary Art)。免費入場,自由捐獻。

 

 

自駕遊要知的事 - 墨爾本Federation Square泊車小貼士 –

ACCA附近大量錶位泊車,照片所見係Sturt St嘅兩小時泊車位。建議泊Grant St,因為係3小時泊車位。

我整日都泊左係Grant St,夠鍾就去入錶,入到黃昏之後就係免費泊車時段,唔駛比錢。係Grant St步行去Eureka Tower同Federation Square都係15分鐘嘅距離,都幾近下。好過泊入去市中心,嘅貴價停車場。

 

Facebook page: http://www.facebook.com/drivingtour

 

我老遠飛去澳洲,又老遠由悉尼開車去墨爾本,為嘅就係入去AAMI公園現場睇A-league比賽。

youtube

Youtube影片: https://www.youtube.com/watch?v=g0bHMm06zKI

係ACCA睇完藝術品,步行15分鐘就到Eureka Skydeck 88,上去可以睇到墨爾本全景。

 

墨爾本街頭有好多馬車出租,帶遊客漫遊市中心。圖中呢部好有花車feel,如果男/女朋友叫你去坐,分分鐘有人向你求婚添呀!

 

今次入嚟AAMI Park係睇Melbourne City vs Sydney FC,係我整個自駕遊行程睇嘅最後一場足球比賽。現場睇A-league真係好好氣氛,球場出面有Club Shop,又有各色各樣攤位比球迷玩,又有得同球星同埋吉祥物影相。

係香港睇 A-League Ch64 會成日見到一大群海鷗係球場飛來飛去,今次可以現場睇埋海鷗添呀!睇完波就步行返去Federation Square搵地方食嘢!架車整晚都係泊左係Grant St嘅街邊錶位,整晚都係免費時段。

 

更多澳洲照片: https://www.facebook.com/pg/drivingtour/photos/?tab=album&album_id=1465021706842827

 

2017年2月24日

2017年澳洲自駕遊﹝10﹞

Read More
2017年06月11日

新加坡動物園

blog4

兩日三夜 新加坡 (4)

 

Facebook page: http://www.facebook.com/drivingtour

Youtube page: https://www.youtube.com/eddiemartin

 

Royal Plaza on Scotts Hotel一行出正門就係巴士站,我先坐167號巴士,去到Opp Nessea Club站轉138號巴士,去到動物園門口落車。個公園有幾部份,分別係Singapore Zoo、River Safari同埋Night Safari,今次就去左Singapore Zoo及River Safari,一個睇陸上生物,一個睇水上生物。

 

 

一入動物園就會見到有好多馬騮係身邊行來行去,有啲係樹上面望住我添。

 

動物園入面有好多種類嘅動物,有大象、犀牛、班馬、花豹、長頸鹿、袋鼠…,而當中嘅鼴鼠我係第一次真身。好得意呀!

 

可能天氣太熱啦!有啲動物就比較喜歡瞓覺或者用個背脊對住我,好以馬來西亞貘同白虎咁。

 

去睇動物劇場「雨林大反撃」﹝Rainforest Fights Back Show﹞時,主持人搵左個靚仔現場觀眾出嚟幫手。個型男以為有咩好嘢益佢,點知原來係要掛條白色大蟒蛇係佢身上,哈哈!

 

過去River Safari要先離開動物園,要由另一個入口進入。由入口行去碼頭上船,條路都幾遠下。途中會見到大鱷魚同熊貓,係呀你無睇錯係熊貓呀!係咁熱嘅天氣,途中有間熊貓館都幾好,一入去即刻涼爽晒。出左熊貓館係紀念品店同埋餐廳,我就係餐廳食左個得意嘅午餐,係朱古力奶皇包及熊貓咖啡。

 

上左船就有啲海風﹝其實係新加坡個水塘﹞吹埋嚟,好舒服。船程大概15-20分鐘,係水塘上面遊一個圈。

 

上左岸之後,對面有個Amazon River Quest,類似激流旅程嘅遊戲。坐住隻小船穿越樹林,好近距離睇動物。

 

River Safari入面有一個水族館,好靚好多海洋生物睇。係呢種昏暗環境之下影相,最緊要手定。用大光圈加30/1秒拍攝,周圍嘅人blur左,但主體仍然清晰。

 

好多旅客離開之前,都會係門外拍照留念。﹝照片入面係韓國遊客﹞

 

係動物園返市區/酒店可以直接坐Express Bus,6蚊坡紙返到酒店。今次第一次租用爽wifi感覺幾好,部機夠長氣,我用足成日都唔駛充電,下次出門都會再租爽wifi。

 

返到市區係酒店對面嘅Far East Plaza醫肚先,我去左食「笨珍手工云吞面」同埋「亞坤」嘅Kaya Toast。食完未夠飽,坐兩個站巴士再去Newton Food Centre食方魚。

 

之後去左Scotts Square嘅Fairprice Finest超級市場,搵下有咩新加坡製造嘅食物可以買返香港。小心呀!部份扮到好似新加坡手信嘅食物,原來係馬來西亞製造。

 

我每次外遊都會搵下當地製造嘅食物,買返香港分享。今次買左鹹蛋薯片同埋鹹蛋魚皮做手信,但其實有啲都想試嘅食物係帶唔到返香港,當中包括新加坡鮮雞蛋及新加坡叻沙拉麵(即食)。雞蛋係生嘅食物唔可以帶入境香港,而叻沙拉麵因為好貴我唔捨得買 ($10.95SGD / PACK, 1pack有4包麵)。

 

食完買完,就去影下夜景。新加坡治安好好,即使半夜一個人係街上面行,感覺都好安全。

 

2017年5月29日

Read More
2017年06月03日

坐巴士遊新加坡

blog3

兩日三夜 新加坡 (3)

 

Facebook page: http://www.facebook.com/drivingtour

 

今日行程緊湊,順次序去小印度Mustafa Centre、魚尾獅、Chinatown Point唐城坊、文東記、Autobahn Motors、2am。

 

得幾日時間係新加坡,我選擇坐巴士去每個目的地,因為可以睇下周圍環境。如果坐MRT就無風景睇啦!新加坡巴士收費便宜,而且係以距離收費﹝唔似得香港啲巴士咁,一上車收你全程費用,咁離譜囉!﹞,記住上車落車都要拍卡。

 

 

由烏節路坐65號巴士,係Broadway Hotel落車,步行5分鐘就到Mustafa Centre。落車之後過對面馬路,就係Smalk Open Space/Park,入面有幾個用雨傘做嘅展覽品,香港人睇見會好有感覺,同時亦覺得新加坡嘅藝術創作空間,比香港優勝。

 

 

係小印度遇見蝙蝠電單車

 

Muatafa Centre係24小時營業,呢個場比較平民化,價錢相對便宜。入面有6層,有男裝、女裝、電器、鐘錶、玩具、電子器材……等等。每樣貨物都有好多款式,男女嚟到都有排行,我就係到買左牛仔褲同搞鬼Tee。

 

 

 

行完要醫肚亦好方便,成條街有好多間印度餐館。我一個人可以簡單食個lunch,就咁係商場外嘅Muatafe Café食個雙層芝士雞肉漢堡包。

 

 

沿Muatafa Centre向左邊行去位於Jln Besar﹝街名﹞嘅Opp Veerasamy Rd站坐130巴士,就可以直接去到魚尾獅公園。落車個位置唔多人,可以影下對岸嘅金沙酒店。可惜我當日天氣麻麻,比較多雲見唔到藍天。去到魚尾獅公園就好多人,想影張靚相都唔容易。見到好多遊客都舉起手同魚尾獅影相,感覺都幾得意。

 

 

 

 

睇完魚尾獅就步行去唐城坊,要去呢個商場嘅唯一原因係,我想去買鹹蛋薯片同埋鹹蛋魚皮,聽聞呢個係近期新加坡手信其中一個熱門選擇。入到唐城坊落一層,專門店就係超級市場入口附近,唔駛排隊買。每包7蚊坡紙,只收現金。返到香港試食左,我自己比較喜歡鹹蛋魚皮,如果配埋碗魚蛋粉就更完美。

 

 

買左好多包鹹蛋薯片同埋鹹蛋魚皮做手信,返酒店休息下先。

 

休息完就行去ION Orchard睇下,因為佢個ION SKY觀景台係免費入場。不過我去到先發現,ION SKY暫停開放直到本年10月,咁只好係商場周圍行下啦!ION Orchard level 4,有一間DAS ERZGEBIRGE HAUS,喜歡木製品或者小型、迷你擺設嘅朋友,唔好錯過。店內有大量得意可愛嘅公仔製品,睇到嘩!男仔都有嘢啱睇,近門口位置放左多款名貴汽車模型。唔係你係玩具反斗城見到幾百蚊一部個啲款,呢到部部超跑都好精細咁拆開晒所有零件,排到靚一靚比你睇。係會睇到嘩嘩嘩!

 

 

對面嘅畫廊係免費參觀,成個場嘅畫,張張都10萬坡紙起。睇嘅時候要小心,唔好摸。

 

夜晚去左酒店附近嘅文東記食雞飯,由我入住嘅Royal Plaza on Scotts Hotel坐5號巴士就可以去到。隻雞可以選擇單人份量、半隻或隻全隻,我要左單人份量加一隻翼,加埋飲品大約70幾港幣。食完啦!隻雞好好味,值得推介。

 

 

之後坐14號巴士去Autobahn Motors,對於喜歡車嘅人嚟講,呢個先係我認為嘅新加坡地標。整坐建築物就好似玩具停車場咁,好得意。入面泊係到嘅車,睇啱可以買走。

 

 

走上對面大廈12樓影

 

影完Autobahn Motors就坐61號巴士去2am食甜品,係呀我又去2am。 ^^

 

新加坡巴士一日遊完結

 

2017年5月28日

Read More
2017年05月31日

@新加坡2am

blog2

兩日三夜 新加坡 (2)

 

Facebook page: http://www.facebook.com/drivingtour

 

把握住端午節假期,請兩日假變五日。用KrisFlyer Miles換張來回機票去一轉新加坡。一如以往,我個Star War拖喼係引人注意,分別係香港機場同埋係Royal Plaza on Scotts Hotel ﹝係新加坡入住嘅酒店﹞ 比人問個喼係邊到買。 ﹝如果有人想賣呢個喼,可以PM我。﹞

 

 

OK,夜晚到達樟宜機場,係機場換錢同買EZ – Link卡。EZ – Link卡用途同香港八達通一樣,係MRT客戶服務中心就可以買到,機場MRT站係T2。坐MRT出市區,係機場站上左車之後坐兩個站,去到Tanah Merah站過對面轉車,就可以一直出到市區。我就係City Hall站再轉車去Orchard站,係酒店放低行李先。

 

 

( 新加坡照片  https://www.facebook.com/pg/drivingtour/photos/?tab=album&album_id=1575970902414573 )

 

出發前透過facebook,book左位去2am:dessertbar食甜品﹝食2am嘅甜品,當然係去新加坡總店食啦!﹞。為左唔好遲到,我決定坐的士過去,聽聞新加坡的士係比較貴嘅交通工具,呢段5公里多啲啲嘅行程,最後係用左10SGD,同一個距離貴過香港市區的士少少。

 

如果想豪可以選擇Limousine Cab ﹝豪華的士﹞,其中一種車款係Chrysler 300C,新車售價係38,635美金起,即係30萬港幣﹝未計首次登記稅﹞。

比個網大家去睇下佢個收費https://www.limousinecab.com/services/transfers/

 

2am:dessertbar位於Holland Village嘅Lor Liput行人專用區,行到街尾左轉就會見到入口上二樓,個門口係比較隱蔽。第一晚試左 Chocolate H2O同埋Cacao Forest,第二晚我就試左Cassis Plum。係呀!我連續去左兩晚,食左三款甜品。三款之中,我自己比較喜歡Cacao Forest,佢個朱古力同Whisky混合左之後,食入口個味道好浪漫呀!就好似見到靚女,暈得一陣陣咁。

 

https://www.facebook.com/2amdessertbar

Chocolate H2O

 

Cacao Forest

 

Cassis Plum

 

回程唔趕時間,坐MRT返酒店。睇下新加坡用卡通去傳遞一個信息,我覺得係會容易接受。香港叫關愛座個名一來好大陸feel,二來好似迫人去做,感覺好差。

 

中途去Newton Food Centre食消夜,睇左一輪叫左個小碗麵試下﹝或者叫小鍋麵﹞。不過幾多嘅美食都總會有中伏嘅時候,呢個麵,有丸啦、魚片啦、菜啦、湯啦、麵啦……,賣6蚊坡紙。離譜嘅係湯入面隻蛋附贈碎蛋殼,接受唔到囉!

 

2017年5月27日

Read More