2018年08月15日

【極危險】練武會遇到嘅幾種人

0

我除咗練過下巴柔,都練過西拳、泰拳(時間極短),重點唔係幾好打,而係接觸過咩人。其實好多人都唔止練一樣嘢,即係話,你練巴柔,會遇到柔道佬、跆拳佬、詠春佬,你練西洋拳又會識到功夫佬、泰拳佬諸如此類,相信練開嘅人都會明。

總之!練武真係會遇到好多奇葩,當然,嚴格嚟講我都算係,但點都好,討論下我對唔同性格嘅人所得嘅觀察,都係有趣嘅事。

 

第一種:半澤直樹

42b8b2cc8bf573d8d2fc645c041325fd

練得武嘅人,大部份都會比正常香港人多一份鬥志,適當嘅鬥志梗係有益身心,但係有種好勝心超強嘅人,明明對打時話咗輕力啲,都會打打下出晒力想致你於死地,如果輸咗畀你,或者畀你攞到小小甜頭,佢都會想辦法十倍奉還,你唔畀佢攞返個彩佢都唔會畀你返屋企嗰隻。

 

第二種:友情超人

05410408531CED446A0A4E4BD3C56495

一齊練嘢練得耐,自自然然會培養到深厚感情,但好多人嚟到間館唔係練嘢行先,上親館就係吹水而唔係練嘢,一開口就係識朋友甚至係識異性,當然,櫻木花道都係為咗晴子先愛上籃球,所以我又唔覺得友情超人唔啱嘅,佢哋起碼肯參與先啦!

 

第三種:相田彥一

下載

唔知大家記唔記得,《Slam Dunk》故事裡面,有隊波叫陵南,陵南入面有個一年級生叫相田彥一,波又無份打,亦唔見佢練波,淨係識得好似記者咁話「一定要仔細調查!」(佢家姐就係記者) 練武嘅場合都會有呢啲人,佢哋非常留意圈入面嘅八卦,邊間館開咗,邊間館發生咩事,佢哋都暸如指掌。我對呢種朋友都係無反感嘅,因為間唔中我都想聽下其他地方發生咩事。哈哈。

 

第四種:危險調查員

4e4a20a4462309f7e0485992790e0cf3d7cad60f

常見功夫佬或練過中國武術嘅人,主要就係佢師傅曾經同佢講,練佢哋嗰門嘅人幾勁,一腳踢走李小龍,又試過以一敵十之類之類,然後呢啲傳說永遠嘅場景都係:

時間:幾十年前

觀眾:佢自己

場地:黑市拳或某個無人睇到嘅地方

呢啲中二病所講嘅嘢,唔知點解都係無正式紀錄,而有正式比賽紀錄嘅人,亦唔會將呢啲「傳說」當係本門嘅威水史講。(注:《危險調查員》乃係浦澤直樹嘅漫畫,主角係一個考古學家)

 

第五種:傷追人

KIZU0860

次次打得唔好,或者畀你攞到甜頭,就會話邊度邊度傷咗,所以咁咁咁;一係就打打下突然按住佢講嗰個痛位,令你好內疚。其實練武實有傷,打打下表示有傷唔係咩壞事,而且係好事,但係就係有啲人發生呢啲事嘅頻率極高,令你有啲無所適從,甚至下次唔想同佢練。

 

(以上排名不分先後,而且其實我唔係討厭佢哋,而係覺得佢哋可愛,另外,如果篇文效果好,會寫多篇都唔定,仲有好多都未講,例如:吳留手、認真便輸了、我派最強等)

Read More
2018年07月25日

【繼續講武術】真實對戰同練習差幾遠?

BL_Podcast_Artwork_ep76_v1_970x545

利申,我無試過真實街戰,頂多試過喺地鐵捉色魔,用力推咗個色魔一下。但我試過參加柔術比賽,當然,無拳無腳嘅柔術比賽同MMA相差甚遠,而MMA又同街戰有分別。

 

問題係,好多練武嘅人日練夜練,都未必可以喺擂台上面表現到所學嘅嘢,尤其是中國武術有好多上擂台嘅失敗例子,我所講嘅失敗唔係打輸,而係上到台完全唔知做緊乜,表現唔到自己學嘅技術,那怕係一招半式,究竟點解?

 

我嘗試用我體驗到嘅柔術比賽嚟做例子,柔術嘅訓練系統本身已經好Tough,平日返館練習,都一定會有對打練習,好多時仲要同大隻過自己,帶段高過自己嘅人,作唔留力嘅對打。但係無論平時點落力去打,到真係比賽嘅時候,成個對戰嘅感覺真係完全唔同,有上過比賽場比賽過嘅人就會明。

 

用文學啲嘅方法去表達,比賽時成個世界會轉得好快,平時練習對打,例如練5分鐘咁,或多或少會有空間畀你透透,會有時間畀你諗出咩招,但真係到比賽時就好唔同,你會發現,對方活動得好快,而你思考嘅空間唔多,好多時係靠你嘅Muscle Memory去做反應,可能我自己體能麻麻,我成日都會諗,點解對方唔會痛唔會攰嘅?當然我之後反思一下,喺對方嘅心目中,我都好似係唔會痛唔會攰咁,科學啲去解釋,係因為喺戰鬥時腦部會分泌好多腎上腺素,令到我哋痛感減低,所以好多傷,都係打完先覺。

 

喺咁集中嘅對打下,體力嘅消耗比平時練習快好多好多,呢個我認為同心理上面嘅緊張感有關,而更重要嘅係,平時練習,你會喺某程度上了解你嘅練習對手(即係你啲師兄弟)體能有幾強,會出啲咩招,而真實比賽時對手出嘅招好多時係你預計唔到。講到呢度,都不得不提,好多傳統武術無適當嘅體能訓練,對打亦只限於傳統招式嘅拆招,無包含格鬥嘅各方面,如果對方唔係架起你預計嘅陣式,你會點?

 

講返去街戰,你就會明,練習同比賽已經差咁遠,街戰嘅情況就更加預料唔到,李小龍曾經講過類似嘅嘢,就係真實嘅格鬥要Ready For Everything,你唔會知對方係唔係得一個人,你會唔會知對手有無武器,你唔會知塊地有幾硬,而你跌落地有幾傷,你出一招平時一打一係Okay嘅招,對方一擁而上又work唔work?

 

我呢篇文想講嘅係,練唔同武術嘅人理應要反思一下,自己嘅練習有無幫到自己喺擂台格鬥甚至真實格鬥嘅表現,態度上亦都應該常存謙卑,不斷思考自己練嘅嘢嘅真實性,咁先係最健康嘅武道精神。

 

啲人成日講武德,我認為,如果真係有所謂武德,「直面自己、了解自己」先係真正嘅武德,真正每一個武者要追求嘅精神。

 

Read More
2018年07月19日

男人點解要練武

14377232209482

 

唔係,我唔係話男人一定要練武。好多男人唔練武都有武者嘅堅毅氣質,本文係想討論,練武可以為一個男人帶嚟啲乜?

 

我算係個練武嘅人,練嘅係巴西柔術, No,唔好以為我好好打,不過我諗我明,練武究竟係咩一回事。真實嘅武術唔同電影中嘅武術,一個人打唔到幾多個,無論你幾強,喺真實嘅街戰場合,你都未必可以100%保證自己全身而退。真係識武術嘅人就會明白,唔好話槍,就算對方係揸住把刀仔,你最好嘅做法,都係走為上著。

 

而更重要係,強唔強好多時同天生嘅體能、反應,同埋磅數,有莫大關係,50kg要打贏100kg嘅人,個難度大家係想像唔到。同埋,大家喺拳賽見到嘅冠軍,佢哋係千挑萬選出嚟嘅精英,呢個世界99.999%嘅練武者,都做唔到最Top,只有陪跑的份。

 

既然派上用場嘅機會唔多,除非你係萬中無一嘅練武奇材,咁你注定係一世都做唔到宇宙最強,咁點解仲要練?

 

對我嚟講,練武係一種樂趣,更加係一種修行,修嘅唔單止係肉體,仲有永不言棄嘅意志力。好,我知咁講好吹水,實際啲地講,練武嘅人,面對突發事情嘅反應同平常人好唔同。

 

發生過喺我身上嘅兩件事可以做例子。

 

第一次係我喺天后大坑行行下,行過一間餐廳出面,兩男一女喺餐廳行出嚟,其中一個男人突然暈倒。暈倒嘅男人攤咗喺地下,同行嘅男女係企咗喺度,仲未反應到,我行過去,一邊問餐廳嘅人呢度係咩街幾多號,一邊叫人打電話Call白車。個女仔終於有反應,但佢仲未function到去照顧佢暈倒嘅朋友,佢淨係不斷同我講:「佢剛剛都無事架!」我冷靜地繼續處理,將個男人攤平,因為正確嘅復甦法係要攤平個人,佢先會易啲醒。我同個女人講:「係,佢剛剛無事,但佢而家有事,小姐你冷靜啲先,我哋已經報咗警,白車好快就嚟。」

 

第二次係我搭地鐵,喺香港站搭緊扶手電梯,突然間前面發出擾攘聲,然後前面企喺我前面嘅人一一被撞開,一個男人好似跳moonwalk咁不斷向後行,撞走晒前面嘅人,就嚟撞到我面前時,我一個閃身避過,再喺佢繼續墮後時轉身扶返住佢(由我發現佢直到佢撞過嚟,只有一秒嘅時間),一埋到佢身一聞,佢極重酒味,原來係佢飲醉酒腳步浮不斷往後跌,我扶住佢再帶佢上上一層時,見到前面好多人都跌低咗,而且直到呢一刻都完全唔知發生緊咩事。

 

即係咩?即係話,就算武術唔能夠令你好打,但一旦有危機發生,受過武術訓練嘅你會係在場最冷靜亦係生存率最高嘅人(尤其習慣激烈嘅對戰嘅習武者)。對我嚟講,練武練嘅唔係練「武」,而係練「氣」,所謂「氣」,唔係《龍珠》入面龜波汽功入面嘅「氣」,亦唔係大陸呃人氣功講嘅「氣」,我講嘅氣,係浩然之氣,一道置身任何可能情況都可以冷靜面對嘅氣。

 

男人就係要有呢道氣。

 

 

Read More
2018年06月12日

你想做占士?我只想Like Mike

jordanlbj

NBA總決賽,騎士雖然輸四比零,但好多人都認為占士已經打得好好,係佢啲隊友廢。我點睇?我覺得占士嘅入球能力、身體能力、進攻、防守、閱讀球賽嘅能力,都係呢一代甚至有史以來最頂尖嘅。

.
不過,呢排我睇到條片,係講米高佐敦喺1998年最後一次攞總冠軍,打總決賽時所面對嘅問題。大家可能都記得喺第六場,米高佐敦點樣射入致勝嘅一球,贏得冠軍。咁嗰一球之前呢?原來當時佐敦面對緊好多嘢,包括:自己35歲嘅高齡,體力嘅下降,第六場手風極之不順,拍檔柏賓受咗傷打不出狀態,仲有就係,如果第六場輸咗,第七場將會係喺爵士主場度打嘅重大壓力。

.
成場波佐敦都打得唔好,但得返幾秒,佢唔只偷咗郵差馬龍手上嘅波,仲極冷靜地射入最後一球。

.
記憶中仲有兩件事係令我對佐敦非常欽佩,第一件就係佢曾經喺練波時同而家勇士嘅教練Steve Kerr初則口角繼而動武,最後係佐敦向Kerr道歉認錯;第二件就係佢腸胃炎,發住燒上陣得到38分,歷史上稱之為「Flu Game」。

.
人人都好想好似占士咁強大,攻又得,守又得,屈機屈到暈,但今屆總決賽後,有一段新聞被占士親口証實,原來第一場阿JR「出圈事件」後,占士一拳打落更衣室塊黑板度,打傷咗自己隻手,搞到自己第一至第三場都帶住呢個傷上陣。

.
愚以為,呢一件事顯示到占士嘅心靈未夠強大,因為我相信如果畀著係米高佐敦遇到Game One咁嘅狀況,佢一定會更加冷靜地面對,絕對唔會因為情勢唔好就做啲令形勢變得更壞嘅事,呢啲先係成熟,正所謂劉華話齋,好牌爛牌都係咁打。

.
占士太強,職業生涯可謂好快就要風得風,場內場外嘅權力都係無限大,相反,佐敦人生受到嘅挫折比佢多,攞總冠軍前,曾經連續三季喺季後賽輸畀活塞出局,如果畀著係而家啲球星,一早轉咗隊,仲可能轉去活塞添!

.
我愛佐敦唔係因為佢贏嘅指環比高比、占士多,我係認為,做男人要做到好似佐敦咁,愈係逆境愈要冷靜面對,愈係唔掂愈要支撐住。當你做好自己,身邊嘅人先會畀你改變,所以,正如Allen Iverson喺上名人堂嘅時候所講,「I Wanna Be Like Mike.」

.

Read More
2018年06月02日

愛情散文家――男人的公敵是你嗎?

33923799_10160360478960425_2829197994140631040_n

先旨聲明,我唔係講緊鄺俊宇,佢寫嘅愛情文只係講下拍拖、失戀嘅心情,甚少見佢話自己對女友點好點好。我所討厭嘅愛情散文,係嗰種成日公開話自己對女友點好點好嘅文章。其實你吹到自己份人幾L深情,呢啲都算,最__街嘅係,呢啲友仔仲要成日提出一種論調,就係:「男人一定要咁咁咁,就算女方百般任性,都要無限遷就」。

 

首先,我十分之懷疑,喺網上公開話自己對女友幾好嘅人,係唔係真係對女友咁好;其次,對女友好,女友知咪得囉,不斷攞出嚟講,無非係為咗呃Like啫。呢種文章對準咗女性讀者呢個市場,不斷翻炒公式,呢一類型嘅作者,仲好興引啲女讀者Tag畀自己男友睇,跟住啲豬妹女友就會Tag男友個名,然後留言:「你睇下人哋對女友幾好?」

 

呢啲文章有咩唔好?點解我要特登寫篇文去講?我認為呢啲文其實帶住一種非常之唔好嘅洗腦作用。英國哲學家羅素曾經喺佢嘅著作《幸福之路》入面講過,人要認清一個現實,就係冇人會好似你咁,畀咁多注意你自己的。人總係先會關注自己嘅感覺,自己嘅需求。人與人之間嘅關係,亦應該係建基於呢一點嘅理解上,但喺戀愛中,好多戀人都會期望對方畀更多更多嘅注意,但呢種期望就算一時間得到滿足,只要有一次得唔到滿足,就會出現怨懟。

 

呢種「男人應該點點點,唔係就唔愛女友」嘅文章,漠視咗呢啲現實,更加冇諗過,每一對戀人嘅相處方式都唔同。啲豬妹睇完呢啲文,以為個世界真係咁,以為無論自己幾任性,對方都應該滿足自己,否則就唔係愛,但佢哋唔諗下,咁樣不斷向對方作出任性要求,咪更加唔係愛?

 

所謂成長,好多時係講緊點去平衡自己同身邊其他人嘅需求。網上面Like呢啲文嘅人,大抵都係好冇安全感,好需要人哋不斷畀「愛」佢。但現實係,建基於安全感嘅需求,係好L難滿足的。而一眾愛情散文家仲要企喺呢班「安全感上癮症」嘅病患者呢邊,不斷滋養、支持佢哋嘅病態想法,此舉唔單止令我哋啲男人好難做,豬妹們嘅期待觸礁,佢哋自己都唔好過,情況同畀毒品佢哋食係冇分別,一旦成癮,又點可能100%滿足到?所以你班L樣做下好心,搵個第二樣嘢呃Like啦,回頭是岸呀!

 

偽文豪FB:https://www.facebook.com/fakeliterarygiant/

IG:https://www.instagram.com/fakemanho/

個人吹水FB:https://www.facebook.com/fakemanho

Read More