2018/05/17

中佬最需要一個相信自己嘅人

171028182001_MPW2555_A102-105_000_crop

早幾年出書講TVB,當中曾經有好多人搵我做嘢,例如係做娛樂八卦節目主持,又例如係幫啲新電視台搞啲宣傳活動,更有趣嘅,係有人搵我做產品代言,呢啲我都一一推卻,因為我好怕。對我嚟講,寫TVB 只係想寫下啲經歷,我唔係打算寫呢啲寫一世,我係想寫故事,唔係想寫八卦。

 

然後出版社好心,真係幫我出咗本愛情小說,跟住書本滯銷,全香港睇過呢本書嘅人真係一百個都冇。

 

我呢兩年都冇寫長篇故事,只係自己練筆,寫咗十幾二十個短篇,而呢啲短篇我都冇公開,因為似乎香港本地對呢啲需要去諗嘅故事,興趣不大。有啲我有畀朋友睇,但十幾二十篇睇晒,只係得我女朋友。

 

前年我同女友一齊一次過煲晒《權力遊戲》,我真係好鍾意,我同女友講,我都想寫啲咁勁嘅嘢。無奈直到而家我都只係一個做Social-Media嘅友仔,人哋一係就唔記得我,一記得,都只係提起我本《TVB血淚屎》。

 

如果我同人講我想寫《權力遊戲》咁嘅嘢,應該會笑L大人哋個口。

 

我到而家都冇放棄呢個夢想,雖然都仲係要搵食,雖然都仲未摸到竅門,但係我都冇放棄。只係午夜夢迴,都會覺得自己可能真係唔得。

 

後來有一次,我女朋友送咗份禮物畀我,我打開個小型紙皮箱,入面係《權力遊戲》嘅DVD全集。裡面有張紙,紙上面寫住,佢話佢相信我有日都會寫到啲咁勁嘅嘢。

人生難得有咁嘅一刻,有人相信你多過自己,比一百句安慰更能夠重燃起我醬爆心中嘅一團火。

 

偽文豪FB:https://www.facebook.com/fakeliterarygiant/

IG:https://www.instagram.com/fakemanho/

個人吹水FB:https://www.facebook.com/fakemanho

COMMENT