2018年05月25日

世界盃唔好賭咁大呀!

images
 
網上資料圖片
 
其實世界盃就嚟舉行,我發現飛時卜成日都有個類似無真人名出嘅戶口賣廣告,就話咩賺第一桶金呀,咩買個package就20萬好快搵到!講緊咩?咪鼓催人賭波嘅群組,叫你俾月費拎tips,又話會俾到中梗嘅心水你。
 
唔知大家有無試過?而且靠呢類tips贏到大錢?我成日諗,如果佢咁勁,點解要搞門生意出嚟?佢自己買咪賺大錢囉!洗鬼搞咁多嘢,又賣廣告又要收你錢賺你錢?真係咁好有錢齊齊搵?咁堅就唔洗搞咗多嘢,嘆世界啦!
 
講開賭波,有人真係一沉淪就搞到永不反身!一場又一場,輸輸吓由幾千變幾萬,借借吓就變幾廿萬,衰起上嚟成過百萬都有!我其實可以話你哋聽,足球真係無必勝,你估真係咁易估?運動嘅嘢,你哋當欣賞角度或買個運氣,幾十蚊,小賭怡情咪算囉!
 
世界盃未開始我話定你聽實爆大冷,因為屆屆都爆冷,國家隊一集合踢成點無人知,突然集體感冒或肚痾你更加吹佢唔脹!點解我咁講?球證自己去到唔同tournament 都有機會病或表現突然失準啦!何況講係踢11人足球,你睇依家中國女排都輸啦!邊話得埋啊?
 
要賭就限一個數,唔好瞓身啊各位,靠賭發唔到達㗎,信我啦!或者得閒望一望你老豆老母,用3000蚊買場波輸咗去不如俾咗佢哋啦!起碼孝順佢哋點都贏咗親情贏咗佢哋開心先!
 
老土嘢講完,世界盃例,今屆係技術指導區域可用通訊儀器,目的為咗球員嘅安全及福利著想,甚至去到戰術需要,教練可即時分析佢哋心跳率同埋跑咗幾多去做換人調動,正過玩FIFA呀!
 
羅碧芝 Facebook Page
www.fb.com/gigilawpg
IG: gigilaw1113

Read More
2018年05月18日

睇波最重要係咩嘢?

bkn-20140613041739282-0613_00822_001_05b
 
網上資料圖片
 
嗱!我性格就好男仔頭嘅!睇波打機食雞我都好,我最憎就係同班兄弟出去玩時,佢被人阻住晒!大家知我講乜㗎啦!次次約親一大班人當中梗有人會放飛機。呀嫂唔放人喎,我就唔知真假,總知次次個籍口都推落個老婆或女友,假都變真啦吓話!
 
對我嚟講最好係,兄弟身邊個女人都一齊出嚟玩,一齊熱鬧,咁先最過癮,又唔洗怕夜返屋企俾人鬧,玩都玩得盡慶啦!
 
睇波有時你估真係去圖書館咁一粒聲都唔出,睇球技睇組織咩!大家一齊研究一齊互串先好玩㗎嘛!睇波最重要,係氣氛呀!氣氛呀你明唔明?如果下下要求男友老公喺屋企睇,佢睇睇吓自然會瞓著,無人同佢傾計或身邊無人明個廿幾條友做梗咩!佢唔悶啊?
 
當然啦,唔係話離譜到晚晚出咗去係好,間中都簽批文出去好合理啊吓話,睇波時唔會溝到女㗎,信我啦!睇波後就唔知XD
 
各位巴打,世界盃愈來愈接近,除咗撐你哋睇波外,仲會喺呢一度同大家分享吓世界盃球例或特別嘢!
 
上次講咗會用VAR啦!你唔鍾意都無用,話咗用就用!咁另一樣嘢就係當踢到淘汰階段呢!打和咪加時嘅,加時嘅時候可以每隊有多一個額外換人名額。而呢個名額唔會理你用晒3個本身嘅換人名額先!咁第4次換人只可喺加時階段即上下半場法定嗰15分鍾使用。就係咁啦!再有嘢更新下期再同大家分享啦!
 
羅碧芝 Facebook Page
www.fb.com/gigilawpg
IG: gigilaw1113

Read More
2018年05月10日

世界盃用VAR,你buy唔buy?

var-c
 
網上資料圖片
 
世界盃就快到啦!大家準備好未呢?有咩準備?好多㗎喎,例如裝收費電視個套餐呀!唔裝都要搵定邊間酒吧或酒樓有得睇波,再唔係同朋友去商場睇波,唔係個個商場都有,都要做少少資料搜集嘅!
 
我睇世界盃嚟講,主要睇吓有咩新球例啦!有咩球證啦!亞洲球證最後做到幾多強賽事咁囉。
 
我估都有巴打想知有咩特別球例會喺今屆世界盃出現,其實今次最主要都係引入咗VAR即視頻助理裁判執法,至於英超一路用緊嘅球門線技術(球證有隻錶會知道個波完全過咗白界未,即決定入球與否),當然都會喺俄羅斯世盃度使用。
 
講返VAR先,唔係人人都可以要求用VAR,例如球員或教練就無權要求呢個情況又用(口個)個情況又用。決定用嘅會係主球證,當然坐喺房嘅VAR發現有事時都會同主裁溝通。
 
指引就寫晒咩情況先可以用,首先,VAR屬於賽事中嘅執法人員,協助主裁觀看重播嘅片段,對於明顯犯錯同埋無判罰嘅嚴重情況,如關於入球與否、12碼與否、直接紅牌(非兩黃一紅情況)、錯誤比黃牌或紅牌比唔同號碼嘅防守球員,VAR於以上情況都會作出協助。
 
老老實實嘅!用得VAR場波一定要停頓,始終坐係房嘅球證都係人,唔係電腦,睇完條片都係要分析要做決定,睇得就睇晒唔同角度嘅片,咁都要時間啊!我自己做完場超聯,睇返所有片都成兩個鐘,上堂考睇片,都有人啱有人錯,所以大家想有個公平嘅比賽都要花少少耐性。
 
當然坊間有好多唔同聲音,覺得足球比賽梗係快上快落好睇啦!我都明嘅,因為我都係比較無耐性嘅人,有人會覺得接受球證失誤係足球比賽一部分,所以寧願要好睇要快!不過去到世界盃級數,都真係全球最重要嘅足球賽事,如因為冤枉波輸,唔止球員教練,分分鐘全國人民暴動都似。
 
所以用高科技有佢嘅好處,但點都會有少少唔好處,包括要等啦,有機會睇完都可能唔合大家心水嘅結果等等。要用到好熟呢套新科技點都要時間,但為咗公平,我祝福所有世界盃球證順順利利,唔好有太多爭議性嘅判決出現,因為我都預測到用VAR點都一定有唔同回響,有版你睇德甲同英超嘅FA CAP,唔係唔想用而係好難用,但係球迷角度唔會理㗎嘛!我又明喎!總知你班友又要快又要準又要公平,我隊波唔輸得!係咪先!
 
總結:祝君好運!哈哈!
 
羅碧芝 Facebook Page
www.fb.com/gigilawpg
IG: gigilaw1113

Read More
2018年05月04日

我母語係廣東話

ben
 
網上資料圖片
 
喂呀香港人,我哋母語係廣東話即係粵語係人都知,但教育局唔知做乜鬼無啦啦就引用咗國內教授嘅講法話「香港漢族人的母語是漢語」,搞到Ben sir發晒火,上網鬧爆教育局!
 
新聞詳情自己搵Ben sir短片睇啦!喺呢度想分享吓其實語言嚟講,我無Ben sir咁勁又學者又盛,普通土生土長香港人,由出世開始講嘅語言咪就係母語囉!同你出世飲自己媽咪母乳一樣,有獨特性㗎嘛!咁如果一出世去咗海外,你由細到大學咗第二種語言,你返到去自己地方都要講返自己本身應有嘅語言㗎啦!
 
即係你出世有奶媽,但奶媽唔係生你出嚟,你都有本身個呀媽一樣,無得唔認。係嗰種語言就係嗰種。由唔知幾多百年前係講廣東話就係廣東話㗎啦!你係要搞到學校搞普教中,搞到班細路混亂晒,有咩意思呢?
 
其實開普通話一科無問題,有時真係唔明點解要用普通話教中文呢一科?搞到班細路愈讀愈差,依家好多學校都發現搞唔掂寧願唔要資助!
 
普教中呢個問題,有好多本地學者都寫唔少文章,講出個最大問題係會減低小朋友學習詞彙嘅能力,收窄腦袋思考功能,細個你媽咪教你嘅廣東話詞彙,入到學校有人話你知咁講係唔正確,你叫班小朋友點樣學中文?究竟邊樣主邊樣次?
 
我自己教過書,除非教中文嘅同事本身係國內人,如果後天先考個普教中牌去教中文,講真又叻得去邊?你要洗腦就一係好次國際學校咁,全間學校所有科講一種語言授課,上體育堂都講英文,由英文轉為普通話,咁咪正式洗腦教育開始。但可惜我哋大人連老師自己本身講普通話都未必掂,咁又點教普教中呢?
 
嗱!唔關老師事,佢哋都唔想,學校要推佢哋都好唔想哋去考個牌,為份工迫住做唔熟悉嘅嘢!個重點係推個班人有無諗過,母語根深柢固,其實成個廣州都搞唔掂,唔好搞香港啦好唔好?
 
好地地當其中一科,我當英文咁學多種語言無問題,但要玩到取代,教育呢一步點都要堅守,寫咁多嘢我表明立場支持「粵語係香港人嘅母語」,做家長嘅話要小心選擇學校,普教中嘅學校有機會搞到個仔講嘢一舊舊,分分鐘同你牛頭唔搭馬咀,自己諗啦!
 
羅碧芝 Facebook Page
www.fb.com/gigilawpg
IG: gigilaw1113

Read More
2018年04月27日

食雞增感情

2018_04_27_gigi menclub
 
網上資料圖片
 
個個都食雞,你有無食啊?你唔好話我知你唔曉咩係PUBG亦係Players’ Unknown Battleground(絕地求生),呢隻game由小學生至中佬都玩呀!你如果真係咁”攰”唔知玩咩,咁我用極少字講解一吓先。
 
首先,呢個game依家大部分人都用手機玩,因為好方便,入到去可分自己玩,兩人或四人連線一齊玩。首先就成班玩家搭飛機,主地圖會有唔同落點自我選擇,一落到荒野地面去唔同地方執武器,主要用槍殺死其他玩家。而喺限時內要去電腦指示嘅範圍,目的係收窄玩家可行區域,增加互相廝殺機會,最後生存嘅玩家就贏!
 
贏咗第一後,外國句英文係winner winner chicken dinner,大吉大利,今晚食雞,所以中文就贏咗有雞食!所以搵fr子夾腳時,會問人食唔食雞就係咁計。咁呢個遊戲我開頭都玩香港版嘅!但就發現唔太順,有時去到生死關頭hang機真係想喊出嚟,明明就贏,竟然無晒反應,真係激到成晚都瞓唔著呀!
 
所以,依家都會同朋友一齊玩大陸個絕地求生,因為佢已經開發咗一段時間,bug比較少,玩法亦多咗個娛樂模式,槍款又多,又有團隊一齊跳傘,總知玩大陸版好似玩進化版咁順去好多。
 
呢個遊戲其實最搞笑都係大家可以講住嘢溝通,好似打ps fifa時你都會駁個咪叫隊友交波一樣。依家戰場上配合殺敵,唔講嘢真係搞唔掂,過程當然好搞笑又好玩,開個食雞WhatsApp group睇片研究,互相取笑吓,平時唔多傾計嘅朋友都傾埋一份好過癮啊!
 
大家唔洗擔心會太沉迷,因為食雞嚟講,要好全神貫注,同埋要開大個聲,聽敵人走近聲音,而玩一鋪又廿幾分鐘,最大件事係好食電。所以大家通常都係約臨瞓前打一鋪就覺覺豬。唔會阻好多時間,亦唔會太有課金嘅心態,當做完一日嘢好辛苦時同朋友放鬆吓增進感情,係幾好嘅選擇!
 
羅碧芝 Facebook Page
www.fb.com/gigilawpg
IG: gigilaw1113

Read More