2018年07月13日

男人們回家了

OSP180705-8244-1120-M
 
網上資料圖片
 
世界盃得返季軍戰同冠軍戰,巴打們愛隊要留就留,要走就走,悉隨尊便,冠軍由法國對克羅地亞,究竟有幾多人預測得到克羅地亞打到入決賽呢?而又有幾多人一早買咗格仔衫咁有眼光?只可講句:「我真係恭喜你囉!」
 
話時話,經歷咗呢個月,大家鍾意出街睇波就睇波,唔洗拎批文就放到假同班老死吹波經飲通宵,就算你嫌攰,唔出街都留喺屋企個客廳睇波,另一半唔理你瞓咗先嘅呢種生活,大家係咪好享受?
 
有無試過,聽到你完全唔識足球嘅女友或老婆問你世界盃究竟幾時完?佢又唔可以拎正牌嘈你4年一次睇波,你又無做壞事睇得咁高興!佢一路其實監察住你整個過程,你過埋呢個星期日,唔好意思,你將會回歸平淡,而嗰種失落感更到咗前所未有嘅階段!
 
大家係時候塵歸塵,土歸土,做返屋企個司機、電工、搬運、隨從、你女人發洩對象、你呀媽同你老婆之間個夾心等等!
 
無事㗎!你命該如此,世界盃完啦!接受現實啦各位,唔好再FF,最多期待一下8月尾英超開鑼,到時將你對國家隊嘅熱情轉為球會,在此祝福各位,批文長拎長有!
 
羅碧芝 Facebook Page
www.fb.com/gigilawpg
IG: gigilaw1113

Read More
2018年07月06日

《8強啦!睇波還睇波,小心身子呀!》

unnamed
 
雖然有好多人話德國、阿根廷、西班牙出咗局嘅世界盃唔再係世界盃!但你班人咪死死地氣睇英格蘭加時射碼睇到凌晨5點!不過老實講下線真係好緊張(我指結果),4場有3場加時射碼,心血少啲都死,睇住愛隊出局同真係睇住愛人喺你面前死嘅感受真心無咩分別!
 
而睇到英格蘭入到8強真係開心到滴咗兩滴馬尿出嚟!至於上線就比較好睇嘅,比利時對日本更加睇到人熱血沸騰,個個明明前幾日鬧爆日本,到踢完16強又失憶症發作,除咗睇波外,睇大家嘅反應都真係幾正!
 
睇波睇到個人腳步浮浮,大家有無射波?索性為咗世界盃請個大假,日日睇波為樂?但堅持返工嘅人相信都唔少,我都出席好多唔同活動同工作,仲要加埋練習,4年前嘅經驗話我知,通一晚頂,體能大跌8成!
 
我無吹水,就算有得瞓,都真係會成個人好浮,所以今屆我醒,預先食咗對心臟同肝臟好嘅supplement, 我buy天然成分嘅,因為我做球證嗰到就快體測,幾嚴峻,食咗之後keep到個體能都好夠啦。
 
嚟緊都仲有4場2點開波,大家加油,真係睇波量力而為,做勞動性工作嘅更加小心為上。最近大陸有位球證體測時跑到尾聲因心臟病突發,只有35歲就離開人世,咁後生就走真係好可惜,大家堅要注意身體,平時做吓運動,硏究吓食有質素嘅天然補充品,得閒做吓身體檢查,真係會幫到手喎。
 
羅碧芝 Facebook Page
www.fb.com/gigilawpg
IG: gigilaw1113

Read More
2018年06月29日

睇世界盃,I know that feel

images-1
 
網上資料圖片
 
世界盃世界盃小組賽終於!終於踢晒啦!30/6開始淨返16場比賽,好唔捨得之餘又覺得睇波睇到無咗半條人命,每日起身個感覺真係幾鬼難頂!
 
相信大家呢段時間,每日都同自己講,都無話場場想睇晒,始終第二日要返工,但唔知點解,睇睇吓又會睇埋,愛隊踢兩點嗰場更加唔會放棄!愛隊死對頭嗰隊,又要望佢出局,你諗吓幾鬼忙呢!
 
然後呢段日子,日日又要研究愛隊出線機會,頭一場好似食咗驚風散咁,最後一輪小組賽又要驚出唔出到線,I know that feel,支持阿根廷嘅兄弟!
 
至於巴閉少少支持英格蘭、比利時、俄羅斯或烏拉圭嘅你威,諗埋玩走線。你哋仲有得過癮就好好珍惜啊!你諗吓德國粉絲真係喊出嚟!話就話忠粉點都支持,但四年一度,入唔到16強,再睇落去都唔知為乜?
 
人人仲傾梗16強點點點嗰陣,你叫德粉如何是好?嗱,不過我哋香港人,唔會咁易放棄,自己愛隊唔掂,你身邊總有人會以睇其他隊死嚟安慰自己!
 
你將會好快聽到:「超!入到16強咪又係出局!」「嗱,俾你踢決賽咪又係輸俾xxx!」個酸味直情由心而發咁拉你落水,哈哈!
 
不過老實我好鍾意同班fd打牙骹戰,你串吓我我串吓你其實好好玩好搞笑!睇世界盃都係開心,大家千祈唔好動真火,仲有唔好傾家蕩產咁買波,真係會輸死人,估唔到㗎足球!
 
羅碧芝 Facebook Page
www.fb.com/gigilawpg
IG: gigilaw1113

Read More
2018年06月23日

寄生獸係由男人提煉而成

unnamed-3
 
網上資料圖片
 
話咗你班人啦!世界盃開始咗,個個咪捱眼瞓晚晚睇到4點!邊個話無氣氛?話今屆無嘢好睇?個個都不知睇到幾開心!
 
不過我自己其實今屆本身期望唔夠膽好大,開頭我都諗會唔會同4年前差唔多?點知愈睇愈有味!德國都會輸,同四年前唔同晒,日本贏返哥倫比亞,所以睇世界盃真係睇到,4年嘅改變實在唔少。
 
兄弟,4年前你睇波,身邊嗰個都未必係而家嗰個啦,哈哈,所以我哋做人嘅嘢都真係永遠展望將來,你4年前無,唔代表之後無啊!做人最重要開心啊!
 
講咁耐想講咩呢?其實做人同睇世界盃一樣,兄弟們,唔好咁大壓力啦!睇波為輕鬆,搵伴侶為咗乜?我發現好多男人好多嘢愁,愁身邊個女人提出嘅要求,包括要樓要車要你有穩定收入要你絕緣要你隨傳隨到!
 
其實做人做自己,一定最開心,兩個人嘅關係入面,點樣令到互相尊重,然後互相進步,往往係由男人方面嘅反應培養出來!例如你對個女人千依百順,他日要求嘅條件只會有增無減。做人要有空間要有時間做返你自己,一段關係先可以歷久常新。
 
如果你想做自己,去睇波去搵兄弟食飯,你未拍拖前都係咁,不妨用行動證明你係唔會變。因為一個女人如果無咗自己,做寄生蟲要痴住你,同你一齊無進步不特止,只係將世界集中喺你到,呢個就係男人嘅問題。拍拖結婚變坐監,係你自己攞嚟無得怪人了。
 
羅碧芝 Facebook Page
www.fb.com/gigilawpg
IG: gigilaw1113

Read More
2018年06月16日

世界盃女友條件?我齊晒又點?邊有用㗎?

download
 
網上資料圖片
 
嗱嗱嗱!世界盃開咗鑼!大家真係日以繼夜,夜以繼日咁沉迷足球。同時好多網上足球平台諗住幫你哋班巴打,就列幾廿條好女友的條件出嚟,等你哋打定個底,「希望」呢個月出街睇波一切順利。
 
我其實自問真係做到晒所有條件,但咪又係要約班老友睇!麻甩中女好明班兄弟!咩識VAR同offside,基本啦下話,所有球例賽例嘢,我教埋你又點話?然後話要知曼聯無份踢、碧咸退咗休、荷蘭無入圍,資料性嘅嘢,你真係咁想同你女友傾咩?佢問你嘅話你答係同唔係根本無分別,因為佢唔會記得!
 
然後買花生啤酒俾你睇波、搵埋link俾你、一齊打FIFA,行動性嘅行為,其實唔煩住你就最好啦!買完一大堆搞完一大輪,要你執手尾善後,你仲煩,問一句:「做咩飲唔曬啲啤酒嘅?」搵link搞到中晒毒,到時唔煩死?
 
講真世界盃其間,對女朋友,我覺得真係一個條件搞掂晒!就係「無條件簽批文放你出去玩而唔打俾你問你幾時返!」
 
就係咁簡單,基本上男人睇波同班老友記出去吃喝玩樂睇世界盃,唔係想慢慢照顧人、同你探討球例、唔係要你服侍、唔係想睇完波再要送你歸家!
 
佢哋淨係想無後顧之憂去笑餐飽去鬧得癲!睇波為咩?支持愛隊,為啖氣,為咗笑,為咗開心!返工全日最期待今晚同呀強去酒吧、商場、K房睇場波,對住呀強無壓力,因為呀強唔會迫我飲少兩杯,呀強唔會嫌貴,呀強會一齊X球證球星,對住呀強可完全做自己。
 
大家嘅女朋友,預備定放寬政策,定期簽批文啦!轉頭屈一兩個包包咪算囉!哈哈!
 
羅碧芝 Facebook Page
www.fb.com/gigilawpg
IG: gigilaw1113

Read More