2018年09月14日

人愈大愈唔鍾意打風

images-1
 
網上資料圖片
 
細細個要返學,9月時份,最好打大風或黑雨咪可以偷懶唔洗上堂,然後喺屋企玩玩具睇卡通!諗起都好爽!
 
呢個期望去到出來打頭兩三份工,都心懷希望,打風就賺一日額外假期,好似拎咗著數發咗達咁!
 
但唔知由幾時開始,發現打風其實會有好多人仲開緊工,身處極危險嘅工作環境下,分分鐘有身命危險,睇到新聞有人出事,內心會好唔舒服。
 
然後諗起好多小動物,流浪貓狗嘅情況,更加唔想佢哋有事,雖然係人都想獲得意外假期,不過唔知係咪年紀大咗嘅關係,呢類心態開始愈來愈少。
 
細細個唔明白父母腳踏實地嘅思想,最好俾我不勞而獲,原來年紀同經歷真係會令人改變及成長!唔想認老都唔得,真係一過30歲,細個唔食嘅嘢會轉口味,有好多習慣會改變,心態上都係。
 
呢個風好勁,打到嚟嘅時候,大家都小心啦!唔好亂咁睇海追浪,你有事只會害到救你嘅人!人哋都有父母家人,唔好要人哋因為你而身處險境!自己條命唔重要都唔好拎人哋條命較飛呀!
 
羅碧芝 Facebook Page
www.fb.com/gigilawpg
IG: gigilaw1113

Read More
2018年09月07日

全民造星睇到喊晒

star-01_XMyPb_1200x0
 
網上資料圖片
 
大家有無睇Viutv套《全民造星》?即係有100個男仔參加電視節目比賽,透過比賽希望加入娛樂圈成為明星!話說我之前世界盃就幫Viutv做節目嘉賓主持,有時呢班男仔會嚟表演唱歌跳舞,當時節目未出街,覺得佢哋喺後台前前後後又真係好團結,就算已經出局嘅又真係會去商場支持其他繼續比賽嘅人。
 
而無論有無鏡頭,花姐都真係照教照醒佢哋班後生仔,睇得出佢好重視好緊張,好多人睇完節目愛上花姐,因為佢直接、又坦白,佢嘅意見真心為參加者好,如果大家人生中遇上呢類人要好好珍惜,世上坦白直接講出你不是,唔係為鬧為針對,真心出自幫你為你好嘅人,除咗老豆老母外,願望全心全意無條件教你嘅人,真係唔多!
 
至於,我曾經都聽過人講,佢哋100個人參加,當時我未知賽制點玩,有人講:「如果100個得1個贏,即係有99個浪費緊生命!」我真係原句直出,無改過。
 
當時我無出聲,因為,講更多都無用,人生追求夢想,係一個過程,我親眼見到佢哋嗰份感情,係無嘢可以代替,做所有嘢唔一定要贏,贏亦唔代表一帆風順,大紅大紫,輸亦唔係完全失去機會。
 
所有比賽得一個冠軍,如抱以上嘅「浪費生命」講法,其實人生做咩都無意義。
 
我相信呢班男仔,學到嘅係做人態度、友情、尊師重道、團結等等,睇到成個節目佢哋每集進步,講真,俾錢買都買唔到,最後,我想講,我都好鍾意姜濤BB,希望贏同輸都好,將來可見到佢繼續愛跳舞唱歌!
 
羅碧芝 Facebook Page
www.fb.com/gigilawpg
IG: gigilaw1113

Read More
2018年08月31日

《理財大法,由生日禮物開始》

images
 
網上資料圖片
 
父母喺個仔十歲生日時送十萬現金做生日禮物,有錢人當然送乜都得啦!不過價值觀由呢一刻已開始改寫。從來無試過平凡人(或基層)生活嘅人,講到你自己十歲幾咁識對錢有概念,唔會亂洗都好,呢個所謂唔覺得自己含金鎖鏈有著數,想表達自己其實好努力,無父幹都係叻仔等等嘅心態。已好好反映出,何謂真正靠自己能力取得成功?其實成功嘅人或真正對社會有貢獻嘅人,會唔會講得出呢類說話?
 
社會上唔會得一個富二代,有錢嘅人太多,但係咪個個都真係叻真係勁?懂得利用自己優勢再去發揮,咪勁囉!唔洗講到自己有無優勢都好似好勁咁,因為有十萬唔亂洗,同我哋十歲每日得5蚊,應該點洗,我覺得我哋呢種先叫識用錢,識慳家,對父母嘅辛勞真正從生活上充滿感激。
 
而拎支筆簽個名就買到層樓嘅人,教你儲錢置業,講真,有無說服力?一個本身天生36D嘅女人教個32A嘅豐胸?咪玩啦!
 
我欣賞嘅人,係做咗善事唔會走出嚟邀功,古天樂、周潤發、劉德華,佢哋做完善事會唔會要人讚?呢種夠貼地,曾經捱過嘅人,咪明白其他人困難,出於同理心,真正幫人囉!明就明唔明就唔明,唔好再扮明啦求吓你!
 
羅碧芝 Facebook Page
www.fb.com/gigilawpg
IG: gigilaw1113

Read More
2018年08月24日

為亞運運動員打氣

images
 
網上資料圖片
 
由細到大做運動去比賽都覺得代表住一種意義,例如代表學校個社、代表學校、代表香港等等,唔可以話好偉大,因為鍾意玩運動的而且確係我,但我好了解,總有一班人會因為有呢一類代表,贏得獎項而好興奮,為你好高興!更好自豪可以同你屬於一個組織、一個社團甚住同一個國家。
 
呢種情懷,每次我去落後國家都好深感受,有時我唔明點解香港人好冷漠,而家亞運舉行當中,又有幾多人會為代表住自己地方嘅勇者打氣?
 
有幾多個會真係關心呢班日練夜練嘅運動員付出幾多?你可以話佢哋自己鍾意做運動,佢選擇呢條路,但其實佢贏到,都代表住我哋,香港人就係咁,唔係自己親朋戚友比賽,唔關自身事,就可以完全唔關心體育新聞。
 
老實講,唔好淨係留喺香港做一隻井底蛙活喺每日營營役役嘅範圍,去旅行唔好掛住shopping,人生要識唔同國籍嘅朋友,係朋友呀!先會知道自己有個根嘅重要性!有運動員喺唔同項目贏到獎牌,我哋每個香港人有份㗎!
 
做運動員生涯有幾長?大家都知好短!搵到幾多錢?香港,唔多啦!訓練辛唔辛苦!你話呢!但佢哋無放棄,點解我哋唔嘗試行多一步主動支持佢哋?玩運動都係文明世界中嘅比拼,唔通你想打仗話自己人種勁咩!唔係咩都講錢啊!講起講錢?香港都輸啦,每日住嗰幾百尺,大嘅咪八百尺好未!住又細,工時又長,無嘢贏人!回歸原始,支持亞運運動員,贏輸都支持佢咁努力練習為香港上場嘅每一位啦!咁多網上平台,每一個留言打氣我相信佢哋都好開心啦!加油!we are Hong Kong!!
 
羅碧芝 Facebook Page
www.fb.com/gigilawpg
IG: gigilaw1113

Read More
2018年08月17日

真人版入住請敲門

download-3
網上資料圖片
 
今期同大家講鬼故,話說由細到大唔知點解都好迷信,我父母同家人都唔係拜神底,亦無宗教信仰,但偏偏得我成日對鬼神好有興趣,會成日睇鬼片、聽電台嘅靈異節目、睇入住請敲門等等關於探靈嘅電視節目!
 
要睇又要驚,要驚又想知係咪真係有,然後有時有人講鬼故都聽到起雞皮,半信半疑又入咗腦。有無人會好似我咁?我相信都有唔少人鍾意聽人講「真人真事」,咁家陣鬼節,你話無做衰嘢,唔洗驚,但夜少少返屋企你唔驚呀!?
 
入正題,咁我最近就有睇99台嘅「入住請敲門」個節目,係講一男一女主持去酒店探靈咁啦!明知一睇都大鑊,因為我將要出外做嘢,要住酒店,話唔怕就吹水啦!
 
咁我今次要分享呢!就係我同事講嘅,今次入住嘅酒店其實幾新幾靚,但佢哋上次來就發生咗件事,簡單講,兩個人一間房,一齊晚晚半夜聽到有聲,細細聲整吓嘢咁,如是者唔理,去到第五晚,終於,又有聲,醒咗後又想瞓之際,突然一吓「嘭!」張凳撞落檯嘅聲!嚇到佢兩個跳起,半夜可以做嘅咪蓋被過頭念經文啦!念念吓,好熱,又好奇,時間耐咗咪開返張被,一唔睇都算,一睇,有個「人」喺張凳隔離,嚇到屎都標,成晚就唔敢離開張床,又唔敢同人講。
 
成單嘢,聽完,再住同一間酒店,你話驚唔驚,搞到我晚晚都望吓角落頭望吓張凳,不過由於太忙嘅關係,我晚晚攰到變咗死豬,所以唔洗擔心我!
 
其實講鬼其實好似講八掛嘢咁,我覺得好過講人是非呀!起碼所有嘢唔係為傷害人而講,都係傾吓計交流吓咁囉,如好反感咪唔好聽,唔好歧視我呀!
 
羅碧芝 Facebook Page
www.fb.com/gigilawpg
IG: gigilaw1113

Read More