2016/12/20

聖誕就快到,我祝福你!

2016_12_20_Gigi MenClub 1
 
2016_12_20_Gigi MenClub 2
 
鳴謝相片提供:HKFA
 
未做足球球證之前,每年聖誕節都會同朋友開party燒嘢食,打吓麻雀或者成班圍埋小賭怡情,第二日唔洗返工,多數玩通宵三公大細笑一晚。呢個回憶對我嚟講可以用「青春」形容,大概6、7年啦,真係好耐無試過大時大節通宵忘我玩樂。
 
我都有試過聖誕節約唔到朋友,要做宅女自己煲劇,嗰種無拖拍,寂寞到個心好似去咗外太空嘅心情,我絕對明白。後來,做球證生涯十年入面,我發現個生活模式不知不覺已經轉變晒。唔知幾時開始,大時大節總會同個足球一齊過,家人朋友要約我,都要就我做球證時間。
 
生日、新年、聖誕節、情人節,當收到通知要喺以上日子做球證,我都會好快就應承咗,一來我覺得做場波用盡都係4個幾鐘,做完就去開飯交換禮物,二來唔洗諗去邊度慶祝,三來做自己鍾意做嘅嘢,都真係幾開心。最重要可以慳唔少錢呀嘛!
 
資訊發達年代,球員球證都有fb,今年生日我又去咗做場友誼賽,一去到球場,好多球員同你講happy birthday,都咪話唔開心呀!好快就聖誕,就算唔洗做球證,我都會入球場睇波,好多年都係咁,好似好多人同你一齊慶祝,氣氛好好。一入場好多球迷又會講祝福說話(真祝福呀,唔係問候語,ok?),足球的確係可以聯繫好多人與人之間嘅關係。
 
話說就快聖誕,我記起件事,諗返都幾好笑,我喺頂級聯賽多數做後備球證(即第四官員),要處理換人、球員受傷呢啲就基本嘢。最高層次嘅任務就係處理教練情緒,呢個位係三煞位,因為做錯嘢嘅唔係你,但第一時間俾人鬧就係你。總知入面個裁判團隊做得正唔正確都好,出面後備席要搵人出氣嗰陣,呀四麻煩你處理吓。做得呢個位都要有啲轉數,我自問轉數一般,不過喺正常情況下都算有禮貌。
 
嗰場波,教練對球證判決唔服,最近係我,佢當然好激動咁投訴。當我聽晒佢所有不滿後,唔知點解突然好想祝福佢,我同佢講:「唔好咁勞氣,呀!今日聖誕,聖誕快樂。」點知,個教練又真係無咁勞氣,我唔知佢俾我吹脤咗定再鬧我都係暖肚好過,完場佢有過嚟道歉。
 
嗰一刻,我發現喺節日做球證原來可以化解到危機,再試吓新年做主裁判嗰陣,當兩邊球員想嘈交,我咪又用返呢招:「喂,冷靜啲,新年流流唔好嘈交,新年快樂呀嘛!」哈,兩邊又收聲握手言和。聖誕將至,你哋無嘢做咪入旺角場囉,可能我會喺觀眾席祝福你,一齊過節咪幾開心!
 
羅碧芝 Facebook Page
www.fb.com/gigilawpg
IG: gigilaw1113

COMMENT