2016/12/29

女人令男人討厭三大行為

2016_12_28_Gigi Menclub Column_女人令男人討厭三大行為3
 
網上資料圖片
 
作為球證,我都算係生活喺男人堆,都時不時聽到男人呻,呻工作、呻生活逼人、呻社會問題,其實呻吓好正常啫。因為大部男人要面對嘅問題,都唔係女人話咁易就明白,就算明,都唔會完全感受到嗰種壓力。不過聽得最多,都係呻老婆/女友好麻煩,佢哋堅係用「好麻煩」嚟形容。
 
要組織一個家庭,由結婚、買樓、生小朋友,唔同階段嘅壓力,女人同男人係非常唔同。事實上,真係眼見好多男性朋友自從組織家庭開始愈來愈殘,有部份更性情大變,而身邊嗰個繼續步步進逼,都幾恐怖。
 
睇見咁多巴打有寃無路訴,咁就公開分享一吓巴打講嘅女人令男人討厭三大行為,搵吓共鳴啦。世界上,好多男人同你一樣,比你更慘都有,所以唔好灰心呀。
 
CHECK手機
 
首先,最多男人呻第一位,被睇手機。好多女人都唔介意將手機內所有嘢同身邊另一半分享,因為佢哋都想自己男友/老公都咁樣對自己。但,男人即使有無秘密,佢都唔鍾意人檢查佢手機,會覺得不被尊重。本身同個女同事無咩嘢,傾咗兩句WhatsApp唔記得刪除,就好大鑊。我有次同個兄弟search facebook睇吓外國model,睇完佢即時要delete個history,我忍唔住問,model咋喎,咁都唔睇得咩?原來佢怕麻煩,女人見到唔尋常搜尋,會引起好多問題,好多對號入座嘅比較,想有覺好瞓,醒目仔會定期清手機history。因為神已阻止唔到班女想check你手機嘅欲望。
 
女人免死金句:你身無屎,怕咩我睇你手機啫!
 
Young woman with her dreams
 
錢,比完又比
 
錢嘅嘢呢,真係寫一萬字都寫唔完,有邊個巴打覺得身邊嗰個唔係「騙徒」嘅?拎起右手,舉高手指公,咁你真係好好彩,個讚係俾你女友/老婆。拍拖之後,洗嘅錢係正常幾倍,到開始儲錢結婚,又唔知點解男仔要儲多過女仔,唔係一人一半喎!大時大節之前係班巴打最勤力落球場做嘢搵外快,因為小姐話要食餐好,又係你俾錢。到咗機票有promotion時,問都唔問你有無假期,話機票平,book晒嘢局你上馬。係呀,女人好多都好醒,旅行嘅嘢,機票住宿book最平,俾咗細份,去到行街買嘢食好西時,「小財唔出,大財唔入」嘅道理,你係咪深深咁感受到呢?都話「讀萬卷書不如行萬里路」,有個女人活動教學一樣咁幫助你理解咁多經典道理,仲想點?有時錢都唔係大問題,好多女人安排嘢時,係唔會問吓身邊嗰個方唔方便請假,有假唔代表公司無嘢做,話請就一定請到咩?最後搞到喺公司又要請上司同事食飯,搵人執手尾,啊!即係最後都係洗咁多錢。
 
女人免死金句:唓!你話仲有大假嘅!點知你啫,又唔一早講!(其實佢無問)
 
2016-12_28_Gigi MenClub Column_
 
終極討厭行為:網上平台公開鬧爆
 
依家人人都玩facebook或IG啦,耐唔耐一打開,就會見到有人寫男友/老公不是。而且會將成個事發過程用第一身感受(即受害者角度)演繹出來,完全係唔怕俾人拎來當笑話,因為佢覺得男友/老公好錯,令佢好受傷,要公開俾全世界可憐佢,好多女性朋友睇完一定企女士嗰邊,紛紛留言送上安慰,事主就會愈講愈多,因為有人認同佢嘛!
 
但,呢個時候,男友/老公們已經完全無面到想搵個地窿收埋自己,最慘係班兄弟睇到,唔會同情之餘仲會落井下石。以後出嚟同班兄弟玩,一定會舊事重提,非常無癮。我問過女性朋友點解咁做,寫咗出嚟個問題係咪解決到?其實好多都解決唔到,只不過覺得「佢唔做衰嘢,我無嘢寫到佢!」如果換返角色,男人寫女人,就會欠風度,我就暫時未見過男人會寫自己女友/老婆不是,相反女人見好多。
 
女人免死金句:邊個叫你衰先?我班姐妹留言都話你唔啱啦!
 
總結,男人做咩都係死,大家唔好笑人,無嘢出事都執身彩啦!單身者唔好覺得自己好慘,可能好多兄弟想好似你咁自由呀!
 
羅碧芝 Facebook Page
www.fb.com/gigilawpg
IG: gigilaw1113

COMMENT