2017/01/05

做人唔好太「狗眼看人低」

2017_01_05_ Gigi Menclub Column_
圖:徐至宏
 
大家有無睇今年叱咤樂壇流行榜頒獎禮?話說wyman咪幫欣宜「拉票」,講咗個故仔,當年因為欣宜媽咪喺百忙之中,同當時仲係「小小邊緣人」嘅wyman傾計,令佢感覺到原來都仲有人留意到佢,送上少少溫暖,就咁樣,佢決定要報恩。
呢個故仔大概係教大家「寧欺白鬚公 莫欺少年窮」,我同你何嘗無試過做「小小邊緣人」。喺一大班人入面,好似無位置,做任何事都唔起眼,做得好無人欣賞,做得唔好就被無限放大。
最不幸嘅係,無啦啦會遇到啲「狗眼看人低」嘅衰人?呢種人真係會令到你好想發憤圖強,時不時出現喺你身邊,好似鬧鐘咁提醒你唔好再偷懶,佢哋會做啲咩嘢令你好嬲怒,繼而令你想香港立法殺人唔洗坐監呢?
 
恥笑扮講笑
 
首先,佢會時不時以金錢價值嚟取笑你嘅決定,人與人之間都經常互相取笑,大家會感覺得到係玩定係踩人。舉個例,你可以笑我著衫好樣衰,
但你唔好笑人買件衫好平。「嘩!真係你先會著咁平嘅衫!我就真係唔會買呢啲衫著喇!」大家耐唔耐都會買平嘢著,我就好貼地嘅,三十蚊件衫都會著,我個人認為著得好睇,怕咩著平貨?我又唔係發咗達,買平嘢食平嘢著平嘢,人之常情。但總係有種人隻眼生係頭頂,一聽到你講關於平民分享時,就會笑你平民級。佢自己笑唔緊要,佢會拉埋身邊嘅人一齊要笑你,大聲就羸咁,都唔知佢做咩?你又唔係喺佢銀包拎錢買嘢,究竟邊個位令佢睇你唔起,然後恥笑你呢?你唔會明,但世上總有呢類人囉!
 
2017_01_05_ Gigi Menclub Column_ten
圖:Caters News Agency
 
見高拜見低踩
 
Well,邊個一開始就可以好有經驗值咁直接打大佬呀?個個都係有錢佬個仔咩!課金唔係人人都得呀嘛!當你仲係薯仔個時,睇得最多嘅真人show一定係四川人表演,「變臉大師」喎,你無理由無見過啦!明明對住你黑口黑面,轉個頭一見到大佬行出來就笑面迎人,你驚嘆人世間嘅表情原來可以咁豐富之餘,仲深深感受到,要喺呢個社會生存,就要出賣靈魂嘅重要性!你講呀!有邊個咁巴閉可以黑大佬面仲有職升?我就真係未見過喇!喂!咁擦鞋人之常情呀又,係呀!但衰在佢見高拜完佢要踩你兩腳,平衡自己出賣靈魂嘅悲哀。鬼叫你又唔夠佢老,佢唔恰你恰邊個呀!?等吓啦,過多三五七年你可以恰其他新人啦!地球好似圓嘅!
 
終極「狗眼看人低」:我當你透明
 
回應返wyman點解咁感激沈殿霞,因為大人物喺適當時間對佢作出一點點問候,一點點溫暖,佢銘記於心。如果一個人未試過被當透明,你估佢會唔會咁識感恩?所有人曾經努力付出過都希望有人留意,未必要好有成果,但始終想有人知。你無利用價值,做咩留意你?做人最慘唔係被人踩被人笑,最難受係被透明、被遺忘。被遺忘嘅人就好似浮游生物咁,可有可無,零價值。其實咁大舊生物行來行去,點會睇唔到你,你估你真係透明咩?當然係有人刻意令你被透明啦!呢種人會主動做好多嘢排擠你,令你變得無價值,付出幾多都好,零,你只是零。
 

 
咁話時話,其實又唔係灰晒,但要學識「捱」!係人都捱過,最後出唔出到頭,的確好睇天時地利人和。但有付出,一定總會有人睇到!足球圈都一樣,我做咗十年足球球證,十年前吹足球學校嘅BB波,嗰啲小朋友真係矮我兩個頭,今時今日,佢哋已經踢省港盃。雖然呢班後生仔暫時未必係現今香港足球技術水平最高個批,但吸收夠一定經驗值之後,就會變成香港隊重要核心成員。每個人都有唔同個性,條路走得長唔長,就要睇吓識唔識感恩,唔係時時刻刻要講「多謝」,講有咩用?踢好波,練好技術,用行動證明比得把口來得重要。記住,如果有一日,你遇到有心人,你一定要加倍努力,等睇唔起你嘅人收……埋把口!
 
2017_01_05_ Gigi Menclub Column 2
十年前嘅我
 
2017_01_05_省港盃
2017省港盃
 
羅碧芝 Facebook Page
www.fb.com/gigilawpg
IG: gigilaw1113

COMMENT