2017/01/11

2016回顧,繼續信因果

2017_01_11_Gigi Menclub Column-1
 
2017_01_11_Gigi Menclub Column-2
 
眨吓眼又到2017,新一年,我終於覺得facebook似返facebook,點解咁講?話說最近想update個status嗰陣,都會覺得好似好多餘,依家上fb都係睇資訊、娛樂新聞、唔同專頁嘅笑料。好多朋友都少咗放相同埋講感受,不過,fb有個重要功能,會回顧返之前年份同月同日出過嘅post,所以好多人逢過年都會寫篇2016回顧,無論有無朋友睇到,打一篇文字總結自己一年所發生嘅事,感覺上就同自己講,衰嘢走晒,2017好運會嚟嘅。
 
我都有打開回顧,近年嘅回顧都係講吓足球球證嘅發展,感激幫過自己嘅人為主。好老實呀,話明回顧,好同唔好嘅嘢都要回帶思考一吓,講做球證嘅開心事,都分享過唔少。至於唔好嘅嘢,我本身好少公開講感受。
 
好多人會問我:「喂,你做球證,如果場比賽有個球員鬧你,你下一場會唔會記得?」其實,足球運動係幾特別,賣嘅係英雄感、熱血、信念,正正因為有團火,踢波踢到好激情係人之常情,踢波真係無理由好似去咗圖書館咁。我會睇吓個球員係為咗激情去發洩定係針對性去挑釁,如果本身係踢波情操反應,基本上球場事球場了,完咗場就無事,亦會一場還一場去計。始終球證都係人,會有犯錯機會,對事唔對人咁呻幾句,都好正常嘅。
 
但呢個世界的確唔係咁多人落球場集中踢波,只要一開始比賽,有種唔入流嘅球員就會用把口去挑戰球證底線。因為佢技術未夠班,希望用把口去影響球證判決俾著數自己,從而減低自己未夠班拖累球隊嘅事實,亦期望影響隊友對球證嘅印象,齊齊抽水,最好就所有犯規都吹對面,自己隊就無任何錯失。
 
如果要公開寫一篇回顧,我會好多謝曾經係球場無理鬧過我嘅人,如果做球證無人鬧,無挑戰,無試過被屈,呢個球證叻極有限。基本上一開始呢個興趣,就要明白落得場承受壓力唔係想像中咁簡單,做錯就要面對隨之而來嘅後果,包括網上被球迷瘋狂咒罵,被搜尋起底等。
 
自從踏入社會大學,好明白咩叫「今日留一線,日後好相見」呢個道理,就算遇過幾多辛酸,幾咁賤格嘅人渣,唔公開數臭人係我對自己做人做事一個底線。唔係怕將來自己有咩行差踏錯要求人,而係覺得,做人咁盡,會得到咩嘢先?時勢做英雄,當你有本錢喺手時,做多少少好事,有好多嘢俾你贏咗,分分鐘輸返嘅係你想像唔到。
 
2017,我繼續信因果,你點對人,人點對你。
 
羅碧芝 Facebook Page
www.fb.com/gigilawpg
IG: gigilaw1113

COMMENT