2017/05/02

十個男人九個想AA制

Businessman Throwing his Money Around
 
網上資料圖片
 
AA制嚟講,點解平均俾錢叫AA?有無人專登查吓個來源?我就幫大家查咗,AA嘅英文意思有3個講法,「Arithmetic Average」、「All Average」同「Acting Appointment」。最似樣個講法就有「Acting Appointment」,話說,16至17世紀時嘅荷蘭同威尼斯,下刪數十字之後,總結係因為商人流動性好強,一個人請其他人食飯之後成世都未必見到,咁請來做咩呢?所以大家食餐飯就唔好有人咁唔著數,就大家俾自己個份算吧啦!
 
食飯請客,從來都涉及感情、責任或感激等等因素,即係屋企人食飯可能由父母找數,到仔女大個孝敬父母就仔女負責埋單。朋友間,邊個生日就大家夾錢請佢食餐飯。公事方面,對方幫你一大忙,你覺得講多謝都唔夠誠意,一定要請對方食餐飯表達到感激之情等等。
 
請食飯確實係有目的,你有無諗吓讀書年代,同學仔大家日日見,lunch time個個都俾自己個份錢,幾好朋友都好,如果唔係有特別原因,無啦啦唔會有個同學日日請你食飯啩?
 
一男一女出嚟食飯,如果個男仔對個女仔有好感,點都會爭住俾錢,希望令對方留下好印象,好正常呀!呢個係追女仔嘅目的。追到手,達到目的後,兩個人日見夜見,荷包就慢慢唔見,當感情穩定咗,仲洗唔洗用請食飯去討好對方呢?其實當火花過咗燒得最旺盛嘅時刻,大部份嘅男人都喺心底入面好理性咁覺得,點解唔可以AA制。
 
你搵嘅錢係錢,我搵嘅又係錢,男仔又唔一定搵多好多,要發展一段長時間嘅關係,的確係雙方都要付出。(只適用於我哋呢種一般平民心態,極富有者不適用)
 
至於女仔心態,講真呀,女仔都好多種,不過如果第一次食飯要求AA制,得兩個心態,第一個最大可能性係佢對你無FEEL,自己俾返錢,廢事唔受溝俾對方唱。第二個可能性係,AA都想對方覺得自己唔係一個貪錢嘅港女,如果AA後會繼續出嚟食飯,會繼續俾你感覺得到有好感,應該都係呢個原因。
 
男人去到俾錢個位,如對方要求AA,咁咪AA囉,呢場戲做完大家舒服嘅,無問題呀!如果你真係遇到個表面要AA,背後唱你真係AA嘅女人,咁你要唔要都擺啦,咁鬼衰,俾你發展落去都有排你受啦!
 
羅碧芝 Facebook Page
www.fb.com/gigilawpg
IG: gigilaw1113

COMMENT