2017/05/12

足球員vs女朋友

2017_05_12_gigi menCLub Column photo
 
本地足球球季已到季尾,每一年完成任務嘅時候都好感慨,大家都知我做足球球證,球證嘅工作,外間係唔容許你錯。喺呢個世界上,我相信無一個球證會話俾人聽自己無錯過。唔錯得嘅標準,我認為除咗神同球證之外,女人對身邊個男人嘅要求,都係咁上吓。
 
所以呢,我覺得男人落場踢起波上嚟,同一個熱戀時期嘅女人一樣,一樣野蠻得嚟幾可愛。例如當佢認為球證吹錯,佢會發難,好主觀咁覺得球證明明睇到都專登吹錯,而嗰一刻佢絕對唔會認為自己有錯在先,又或者對方根本無錯。女人都一樣,拍拖時咩都啱晒,有咩都發咗老皮先,理得道理喺邊個到呀,下話?
 
然後,係五五波情況下,通常資歷耐少少嘅球員都想球證俾面佢,會用比較豪氣嘅方式去爭取多少少著數。有經驗嘅球證當然做返睇到嘅嘢,點會咁易被嚇到。相反,新手球證就可能會驚驚啦!咁同拍拖開頭無咩分別,男朋友初期當然咩都就晒個女朋友,但日子耐咗,知你出邊套招數,點會咁易睬你呀?
 
喂,有無落旺角場睇過波,氣氛一流,最正當然係身邊有好多球迷同你一齊鬧爆場中人士,鬧咩都有啦,球員、教練、主辦單位等等,鬧得最多點都係球證喇啩。無論你有無做錯,一定會有人鬧。男人喺一段關係入面,女朋友身邊都有好多三姑六婆好似球迷一樣,佢會批評你全家上下,上至你媽子,下至你個妹,總知你全家人都唔知做錯咩,點都係會對你女朋友唔好,要俾佢身邊班朋友批評再批評。或者你呼吸都有錯,你呀媽講咩都係針對緊佢哋個當事人,有幾可會有球迷會讚球證,似乎都好少,所以,如果你女朋友班朋友都讚你,你真係應該幾好仔。
 
其實,我哋做球證都有目標,每場球賽上,要做二百幾個決定,都知道無可能啱得晒。但我哋希望盡最大能力,喺重要嘅決定上唔犯錯,例如禁區內決定呀!offside關於入球嘅決定等等。做人又點會無錯,唔係吓吓話:「犯咗每個男人都會犯嘅錯」就大晒呀嘛,男人可唔可以又盡量唔好犯重大錯誤?足球比賽去到季尾,點都有輸贏。但男女關係,都係打個和好,其實女人拍起拖上嚟,同你落場踢波一樣,好落力,好值得欣賞,間唔中係會煩咗啲,無理取鬧啲,但佢都係因為鍾意先咁肉緊啫。唔鍾意,佢連場都唔落啦!
 
羅碧芝 Facebook Page
www.fb.com/gigilawpg
IG: gigilaw1113

COMMENT