2017/05/17

撒嬌背後

2017_05_17_Gigi MenClub Column
圖片來源:TVB
 
有冇睇大台嗰套《不懂撒嬌的女人》?相信扭開電視睇呢套劇嘅男士們唔會好多人。原因好簡單,呢套劇標榜香港女仔不懂撒嬌,因為佢哋唔會利用手段去獲得利益,而係用真心去同你相處,所以真性情就係免死金牌。
 
講真啦巴打,無論你身邊個女人會撒嬌,你都明知係假,因為你見過娘娘最恐怖最邪惡嘅一面,所以即使佢心情靚靚想向你撒嬌嘅時候你都唔會再受落。家陣你明點解套劇咁收得啦,出到一套劇去支持香港女仔唔識溫柔嘅一面。我係中女,我都睇到眼淚水都標啊!
 
喺我心目中,男人嘅細心同女人嘅撒嬌事實上係如出一轍嘅。點解咁講呢!話說拍拖初期男人總係照顧周到,女人亦溫柔體貼。日子一耐咗,最明顯一定係生埋小朋友之後,大家都攰到一個點,又邊得閒同你講細心同埋撒嬌呢?
 
不過我認為,男人係比女人更加小器嘅,因為當一個男人間唔中做細心嘅嘢,女人係會感動到喊出嚟,會好珍惜男人間唔中為自己所付出嘅點點心意。但女人間唔中溫柔吓想撒嬌嗲吓你,你就會覺得佢另有所圖同埋扮晒嘢。
 
以上所講嘅都係根據非正式統計,我從來冇聽過男性朋友盛讚佢女朋友撒嬌,佢哋只係會背後話「又想我買嘢啦!」但我真係會聽到女仔讚男朋友/老公好細心尋日接佢放工,女仔總會將一點一滴真係記入心。
 
又唔好講到啲男人好似冷血動物咁,我諗香港女仔撒嬌對香港男人來講,都唔會太work,反而做實事例如煲定湯等佢返嚟飲又或者幫佢安排好日常生活所需要嘅就已經好足夠,有時女人嘅溫柔唔係放喺表面就真係溫柔,唔出聲陪喺側邊,真心真意聆聽對方說話或者俾個擁抱,相信係香港男人更加想要嘅。
 
如果你搵到一個唔講嘢,但係佢喺身邊都令你可以好舒服生活嘅人嗰陣,咁就真係要好好珍惜,撒唔撒嬌,細唔細心,都唔重要啦!
 
羅碧芝 Facebook Page
www.fb.com/gigilawpg
IG: gigilaw1113

COMMENT