2017/06/22

幫人買嘢慘過行乞

01300543033172142243441228600_s
 
網上資料圖片
 
話說每個人身邊總有幾個朋友係好熱心幫人買嘢,小至日常生活用品大至演唱會、波飛、乜飛物飛都好,佢都會有方法幫你搞掂!呢個唔係佢嘅生意,係佢嘅做人態度,幫得就幫。
 
識落呢款朋友真係唔錯,佢每逢去旅行,都會主動問一問你有無嘢買,佢又唔會收貴你,盡心盡力去到海外都WhatsApp你詳情,你要件貨有咩色,全程擔心overload都唔出聲。
 
話說本小姐正是呢種人,真係出於同理心,物價高企,講真有邊個唔想買平嘢?大部份人都想慳得就慳,所以師奶心態幫得咪幫。個人嚟講,有來有往,身邊朋友尚算唔錯,男男女女真係發揮互助精神。
 
好老實,買貨係比較少衝突出現,因為有現貨有相有size先會買,咁大家都好識做唔會亂來,通常一手交錢一手交貨。當然都有人夠膽死叫你方便嘅話一買買20盒返嚟,遇到咁瘋癲嘅朋友就唯有好表明拎唔到咁多,亦有人拎完貨唔俾錢拖到2046咁賤格,呢個時候只可以通知其他朋友唔好再落搭,當幫錯人做善事乜都好無下次!
 
講到最離譜,多數出現喺買波飛或演唱會飛呢類預先訂購嘅非實體貨物。嗱,一睇我就知係買唔起樓嘅低下層,原因好簡單,炒炒炒,無金鎖匙儲來儲去儲唔到首期係我呢類80後常見問題,所以我好憎黃牛!關於「炒」嘅概念,我非常抗拒。例如買演唱會或波飛咁,如果用勞力去排隊買一樣嘢後用更高價錢出售,我個人認為非常卑劣嘅行為,因為有需要嘅人都願意排隊,只不過黃牛黨將排嘅時間拉長,佢哋會一早霸位,搞到你排好後。點解咁多時間排隊不如去做時薪計嘅工,都50蚊個鐘啦!點解要咁樣去搵錢,真係好討厭!
 
好喇入返正題,買飛呢家嘢,有時識人幫手買到內部認購門票,幫到咪幫,手續費都唔收!夠膽死有人會叫你買完飛唔俾錢,三催四請先過數,其實我都係碌盡人情牌先幫到你買飛,如果你咁唔想排隊同黃牛爭,幫咗你咁大忙你都付出吓入錢啦唔該!
 
呢個未算最賤,點解要話俾人知我最憎黃牛,因為夠膽死你幫人買完飛佢轉個頭放上網賣黃牛!我有錢賺我自己唔識賺咩?大佬,內部認購嘅飛唔可以拎去炒其實係常識,出於好心幫你,你就放賣,講真明知賣飛情況緊張,你唔要大把人要,出句聲得啦!唔好講到你買多咗要放,呢類人就真係見識唔少,遇到就永入黑名單。
 
幫人收唔返錢真係慘過行乞,如果你身邊有人願意幫你買呢樣買嗰樣,又唔係要賺取你金錢,請好好珍惜,佢用個心對朋友,你唔好塞返個狗肺俾佢,否則報應到時連唯一平時最願意幫人嘅人,都會對你嘅不幸冷眼旁觀而已!
 
羅碧芝 Facebook Page
www.fb.com/gigilawpg
IG: gigilaw1113

COMMENT