2017/06/29

跟死例做嘢,無錯嘅,唔叻囉!

2017_06_28_Gigi MenClub Column 2
 
資料圖片: HKFC soccer sevens Facebook page
 
2017_06_28_Gigi MenClub Column 1
 
作為一個足球球證呢,每年球例修訂嘅時候,都必須要細心去了解各項嘅新修訂。話說其中一項新嘅修訂係關於慶祝入球方式,入球球員成日都會好興奮然後做出一啲舉動,咁球例入面就有四項情況,做咗就會被球證黃牌警告。
 
其中一項呢就係講緊入球球員以攀爬圍欄方式慶祝入球,以往就唔理三七廿一,見到球員攀上圍欄就會醒張黃牌俾佢㗎啦!即使佢本身有一黃在身,俾多張就係兩黃一紅,根據球例,球證冇錯呀!咪罰佢出場囉!
 
講真呀!跟例你啱晒又點呀?大眾接唔接受先得㗎?球證喺前線,跟球例做嘢好似又冇錯,但係合唔合常理,俾人鬧就一定係球證行先,唔通喺球場有人會鬧條球例咩,有個人棟喺到,你唔追住佢鬧咩?
 
所以球例都幾好,起碼每年會有修訂識與時並進,而家就改到攀爬圍欄導致觀眾有安全性或保安性問題先罰張牌。足球會改例,咁社會法例又會唔會改?又有無人情味?
 
細細個我阿媽就教落,你鍾意做乜都唔緊要,最緊要係唔可以犯法。呢一點我真係由細記到大,直至開始揸車,我終於真正咁犯法,我……我被抄牌啦、時速64公里被影快相啦!
 
基本上每個揸車嘅人士,都會對香港車位不足有抱怨,有時我都唔係想違例泊車,問題重點係無位泊,係唔阻人車出入情況下,泊一陣買少少嘢,有邊個未試過啊?返轉頭睇見張牛肉乾,嗰種心情真係極度嬲怒同沮喪。係,我犯法我唔啱,講到尾我抵死,我最後都會安慰自己,錢解決到,算!
 
但係去到有啲case,大家都會抱住一個鋤強扶弱嘅精神,對政府作出控訴。就好似一蚊紙皮呀婆單嘢,最後都迫到食環對呀婆撤銷控罪。咁係咪即係呀婆無犯法?呀婆大晒?講真,前線嗰班人,根指引做嘢,你可以話無錯,但成件事,都真係要思考吓,當執法時你做嘅所有嘢合唔合乎法、理、情嘅原則。
 
如果個權係你手上,吓吓跟死例做嘢,你無錯,但你絕對唔係叻人囉!就算球例未改例,如果有球員攀爬圍欄慶祝入球,全世界都接受呢個係人之常情嘅慶祝方式,你就出嚟要做主角要趕個球員走,你無錯,但,唔醒囉!
 
當然要做到好叻係要好深嘅內功功力,喺短時間內要思考到唔執正嘅後果、執正嚟做又會點,成件事嘅影響,大家每日都面對緊呢類問題,身邊硬係有啲人會好醒,但又覺得豬頭炳嗰班就高高在上。或者曾幾何時,上面班嘢做細嗰陣都係醒目派,不過上到去就變咗神主。
 
假如你身邊真係有個好醒目嘅朋友,不妨多啲睇吓佢點做人學吓嘢,對你都畢身受用。
 
羅碧芝 Facebook Page
www.fb.com/gigilawpg
IG: gigilaw1113

COMMENT