2017/07/07

喺連鎖集團消費,好耐未聽過「多謝」

79681_WM
 
網上資料圖片
 
話說阿姐中學等放榜嘅時候已經開始出嚟做暑期工,做過薄餅店啦、鞋店sales、超級市場收銀員等等,目的都係吸收經驗,過吓日晨!
 
當年做嘅暑期工都係服務性行業,要對客人要sell客,最開心係得到客人嘅認同,基本上所有part-time嘅工作,大部份時間我都面帶笑容,亦會多謝前多謝後。或者工作時間短,而我亦都知道有限日子去做呢份工,所以都冇咩出現悶嘅念頭。盡量都係好俾心機去配合客人嘅要求,仲好記得做咗個半月健康鞋嘅sales,大批家長帶小學生嚟買返學鞋啦、書包啦。要好詳細咁解釋比佢哋聽點樣護脊,點樣去測試對腳健唔健康咁,當時都真係覺得自己好有耐性,同埋服務態度好良好,成間舖條數都唔錯。
 
到而家睇返做暑期工嘅細路,究竟係時代轉變定係服務行業要求已經唔同?我發現喺香港買嘢或者喺大型連鎖式嘅餐廳消費,已經好難得到一句「多謝」。就好似我尋日去最大型嗰間漢堡包店買嘢食,我睇住個經理好大聲好惡死咁問個客:「你沙律要咩醬啊!」我心諗個客究竟有咩得罪你,點解你要咁惡啫?
 
由於一睇就知個經理係惡雞乸嘅關係,個男客人都應該費事同佢嘈,答完佢要芝麻醬就嗱嗱臨拎個外賣走人。再睇返收銀個位哥哥仔,一睇就知係打暑期工,佢空洞嘅眼神加埋平調嘅語氣,終於輪到我買嘢食啦,佢就咁問我食乜嘢比完錢一句多謝或者唔該都冇,其實我都係消費者啊,點解收銀員可以唔講多謝呀呢?
 
好大程度上都係出於對上阿頭有冇好好咁管教,其實啲細路去做暑期工就係學緊做人態度,個經理唔教都冇辦法。不過咁大個人,都考完DSE或者讀緊大專啦!基本嘅禮貌真係咁難學咩?如果去服務性行業做嘢淨係諗住搵錢,咁其實俾你搵到錢但係自己冇進步過呢個暑假都係白過。
 
有陣時有啲大專生想搵我幫手拍吓宣傳片,可以無啦啦WhatsApp俾我就咁打一句:「你好,我哋想你幫手拍一條宣傳片」,我搲晒頭!究竟你係邊一個?點解你唔會自我介紹?亦唔會稱呼我!拍一條宣傳片ok!但究竟你要我拍咩片?啊!仲有,究竟你係咩機構呢?我通通都唔知!
 
有時我都唔知點解香港變得越嚟越無情,究竟係社會壓力令到人哋冇感情?做任何嘢都係目標為本,定係原來細細個已經無人教,我都已經分唔清。
 
好彩我仲住喺新界西偏遠地方,落到樓下有好多做自己小生意嘅舖頭,每次落街店主或員工都打聲招呼,又會關心吓我隻狗仔。家陣嘅細路其實都唔係無得教,係睇有無人教,講到尾,去到連鎖式店舖消費,今時今日嘅香港絕對係貼錢買難受。
 
羅碧芝 Facebook Page
www.fb.com/gigilawpg
IG: gigilaw1113

COMMENT