2017/07/14

動物傳心師點會執笠呀?

41924540-6a15-11e4-ac79-4f00813de5b1_166272956
 
網上資料圖片
 
幾年前開始喺寵物界盛傳動物傳心師,呢類傳心師聲稱可以透過一張動物相加埋寵物嘅名字,就可以同隻動物有聯繫接觸,會感應到佢哋有咩要求有咩感覺。
 
有線新聞最近就玩大踢爆,邀請咗五個坊間嘅動物傳心師為一隻玩具烏龜傳心,最後冇一個傳心師發現呢一隻係膠玩具,每一個傳心師講法亦都唔同,節目播出之後,喺網上面當然被瘋狂批評傳心師嘅真偽,好多人都覺得呢樣嘢終於俾人踢爆都話假啦!
 
但係我可以話俾你聽,即使有幾多個節目,有幾多篇報道出街,話俾你聽傳心師係假嘅,呢個世界上依然會有人相信繼續去俾錢去用呢個service。
 
冇養過動物嘅未必會明白,我就真係明,我自己養咗隻狗狗10年,平時連佢小便啦、大便啦、想食咩我都知。但係當佢哋開始衰老嘅時候,患有重病,對主人嚟講好多時都束手無策,甚至乎搵咗全香港最出名嘅獸醫幫佢哋,真係去到臨近鬼門關,藥又食過,咩都做晒,當狗狗仲係好唔舒服咁叫兩聲,都好想知佢想點樣,有咩想做呀!有咩想食咁!
 
雖然我自己就未俾過錢搵傳心師,但去到最無助一刻,的確有諗過,都有搵資料睇過吓,最後決定係唔會俾錢做呢樣嘢,透過張相就同隻動物交流到,的確好難令人相信。
 
然後機緣巧合,有朋友嘅鄰居係動物傳心師,可以免費幫我隻狗傳心,既然唔使錢就俾咗張相(要求近照)佢同埋個名去試吓。個結果返嚟話我隻狗感覺好辛苦,已經俾咗答案傳心師,其實係唔想繼續生存落去,好感激我一路做咗好多嘢,好錫佢好照顧佢。
 
我隻狗睇當時睇咗4個獸醫,有3個都叫我打針送走佢,加埋聽完傳心師嘅演繹,意志無咁強嘅主人,可能就送走咗隻狗。
 
傳心師講到好似我隻狗呢一刻死,都死得好安樂咁,我反覆聽咗傳心師啲錄音起碼10次,我就喺度諗,其實一隻狗真係知道咩叫安樂死咩?雖然我隻狗有重病,但係佢仲食得痾得,如果一隻狗真係唔想生存落去,我諗佢連食嘢最基本嘅求生意志都唔會有。我又諗,我覺得我隻狗狗智商其實同人嘅2-3歲差唔多,有病就一定辛苦,辛苦佢又了唔了解食藥其實幫到佢呢?
 
兩個月前,經歷咗自己隻狗爭少少去鬼門關,我發現,人類將心靈寄託予動物身上並無問題,最大問題係將動物人性化。
 
所以,動物傳心師放心,你哋係唔會執笠,因為世上太多人係處於迷失階段,當唯一心靈寄託出咗問題,迷失就會加倍,繼而你哋就會有客仔搵上門。而開辦課程嘅朋友更加唔洗驚,一定會有班人覺得自己有神奇力量,可以學到同動物溝通嘅能力,香港就係咁多機會,香港就係咁可愛!放心啦!你一定仲有支持者,呢排紅,諗計做宣傳啦!唔要面就會成功!哈哈!
 
羅碧芝 Facebook Page
www.fb.com/gigilawpg
IG: gigilaw1113

COMMENT