2017/07/21

香港嘅運動唔係垃圾

2017_07_21_gigi menclub photo
 
圖片提供鳴謝: Lee, Syvio KK
 
香港真係一個幫人搞活動好叻嘅城市,話說最近香港同一時段入面又有英超亞洲盃啦!世界女排大獎賽啦!桌球大師賽啦!籃球又有姚明慈善基金賽,好多NBA明星嚟港表演!
 
嘩,媽好亂!個個都世界級賽事,基本上除咗桌球有香港選手參賽,其餘都係無嘅。我哋住嘅地方,可以協辦咁多大型體育活動,證明地方條件係好優越,有大型場館、有足夠5星酒店、有人力物力!要乜有乜。
 
咁係咪代表香港真係全民好愛運動?英超爆、世界女排爆、NBA爆!有人話香港人係鍾意外國嘢之嘛,事實係反映出香港好有潛質搞好體育,如果喺各項水平上有進步,運動員成績有質素,我諗唔到咩原因香港體育無得搞。
 
我絕對buy香港人鍾意外國體育品牌,人哋搞得出色,我哋係有進步空間,一場嚟到香港搞賽事,我哋應該學吓人哋嘅優點,然後諗點樣令本地進步。而唔係搞完辛苦完一輪,了咗件事就算。以我為例,英超係足球一哥,喺香港搞賽事,成個過程喺英超裁判身上學到嘅,對我畢身受用。有人會覺得,唓,品牌啫!但人哋成功一定有原因值得學習。各方面嘅組織都要學習,唔只係得足總,應該政府要派人去學吓各個賽事嘅成功之道。放長線睇睇,人哋搞得成功就會帶動到當地經濟以及團結氣氛。
 
而家香港社會搞到四分五裂,完咗呢幾個賽事,又返返去本身個灰色氛圍到。有無高官全面啲咁思考吓,投放更多更多資源幫助本地體育或運動員,代表到香港獲獎,協助唔同總會搞好各項本地聯賽,吸引本地球迷支持有益身心活動。睇又好參與都好,成個社會氣氛會更正面更有歸屬感!
 
香港女排聯賽都開始有網上體育平台做直播,呢個自發行為真係值得人欣賞!最高直播點擊過萬,有無市場?我話你知一定有!香港人係可以支持香港運動,問題係點樣宣傳同吸引大家團結。
 
香港真係神奇地,搞乜都可以好出色,如果有政府官員睇到呢篇文真係諗諗去!我哋香港嘅運動員唔係垃圾,只要有support,有後盾就有機會!
 
羅碧芝 Facebook Page
www.fb.com/gigilawpg
IG: gigilaw1113

COMMENT