2017/07/27

球場怪異錄

2017_07_27_Gigi MenClub 1
 

話說英超亞洲盃就得四支球隊參加,兩日嘅賽事入面,有唔少趣聞都可分享一吓!咁完咗個比賽,我就睇到有幾篇足球網上平台網民寫嘅文章,鬧爆香港球迷唔識尊重人,著其他球隊波衫入場睇波。
 
其實我喺第一日賽事見到以上情景,都覺得好搞笑,點解會有人著阿仙奴呀、愛華頓呀、曼聯呀咁!總知咩波衫都有,咁我都明白鍾意睇英超,難得有機會喺香港可以感受到英超氣氛,就算唔係支持呢四隊波,咁入場睇波純欣賞角度無問題嘅。但求其著件衫都好過著其他球隊囉又真係,咁人哋班球迷覺得你唔尊重,嬲嬲豬都正常。當然你可以話你著咩有自由,不過著咩嘢衫到場都代表緊你自己,唔通我做球證我踢拖去大球場咩,入場嗰刻都要著西裝,始終形象問題。
 
其實英國人睇波都好少著短褲,點都會配條長褲,而我喺VIP見十個有九個都西裝,都真係好尊重英超個比賽,覺得係每星期嘅重要節日咁,所以香港人著到奇奇怪怪,我都唔知講乜好。
 

不過咁都唔算最奇怪,再奇怪都有!又再話說英超喺香港唔止搞兩日比賽咁簡單,仲搞咗教練同裁判嘅workshop,仲有showcase,又協助唔同球隊落區搞社區活動咁,都真係好落力搞咗唔少活動。我發現,有某啲香港嘅球迷嘅失禮程度都達到世界級。Showcase嗰日,睇住有人夠膽死拎件利記波衫搵李斯特城球員簽名!人哋唔好意思推你就勉為其難咁簽,點知就愈嚟愈多人拎住其他球隊波衫咁加入。呢單嘢我同班朋友都睇到眼突突,點解可以咁不忠?我解釋唔到點解會搵自己愛隊波衫俾其他球隊嘅球員簽名。有興趣拎張紙拎第二樣嘢都得,但咁隊其他波衫過嚟,叫人情何以堪?
 
2017_07_27_Gigi Menclub 2
 
都算,古怪嘅地方仲有好多,又例如,利記拎咗冠軍,又會有其他有份入場睇波嘅人喺飛卜酸到出汁咁串利記,終於拎到英超一隻盃!大佬,你咁唔鍾意呢四隊波你可以唔睇,但你又要入場又要睇,睇完又要串人又要眼紅,咁想點先?人哋贏又唔俾,輸又俾你話亞洲盃都拎唔到。
 
最後,你會發現,香港人鍾意足球都可以好瘋癲,好多人嗰晚都好享受喺整個氛圍入面,但呢個氛圍其實係每個加入嘅朋友所造成,然後好多人都想香港波都可以咁就好啦!但又唔會願意入場行多步,咁究竟香港球迷想點,我都真係唔係好明。點都好,會歌都真係要耳熟能詳,本地球隊嘅會歌都真係要積極被推廣吓啦!
 
羅碧芝 Facebook Page
www.fb.com/gigilawpg
IG: gigilaw1113

COMMENT