2017/08/03

無現金社會,你buy唔buy?

images
 
網上資料圖片
 
雖然香港係國際金融中心,但原來有樣嘢真係落後咗少少。話晒八達通都由香港搞起先,不過一段時間後就停滯不前(其實可以再進化)。想講咩呢,其實歐洲好多地方嘅市民都唔係好用現金,2016年好多歐洲城市逐步計劃停止製造現金,實行「無現金社會」,市民只需要拎信用卡或手機出街,就可以消費付款,真係幾方便。
 
話就話歐洲興起先,亦有時事評論家認為5年內中國都可以做到無現金社會。得唔得就真係唔知啦,現金交易嘅嘢,中國人嚟講呢,都真係好重要,如果無現金,社會真係會減少好多罪案、貪污腐敗嘅事。正常一個為國家好嘅市民一定會支持,但世上唔正常嘅人又唔少,所以如果連中國都做到,絕對係利多於弊!
 
瑞典有個網絡故事,話有個賊打劫銀行,入到去錢都無得搶,因為無現金,賊都犯唔到法啦!對於整體社會,「無現金」係會減少罪案率,不過香港地,細細個嘅回憶就係拎住呀媽俾個5蚊零用錢去買零食,或者每日儲幾蚊去買玩具。
 
就算「無現金」有幾多好處,好多本土風俗習慣,真係要有現金先開心,例如咩呢!最重要一定係新年啦下話,逗利事絕對係我呢類嫁唔出嘅中女,每年名正言順呃錢嘅好時機,每拆一封利事嗰種開心,都非筆墨所形容。話晒都祝福嚟㗎嘛,點少得現兜兜咁直接落袋咁happy呢!
 
然後第二樣開心當然係一大班朋友小賭怡情啦!玩大細!玩雀九!玩三公!玩麻雀!玩嘅過程入面無現金?唔通用紙筆記低再入數咩!咩癮都無鬼晒啦!
 
有時人大咗,時代進步太快,好似對人與人之間嘅關係都疏離咗,家人可能只會用電話send message傾計,朋友又可能只會用面書關心大家。其實講到尾,「現金」都係一個數字,有無實物的確唔係太重要,呢推數字反映嘅,係你可以擁有嘅生活質素。而我,每個月,親手拎住少少「數字」回家,見到媽媽開心,希望佢唔洗擔心自己,就足夠啦!你估「數字」對老人家嚟講重要咩?「現金」只係一個渠道去俾我哋有個借口返去避風塘度討溫暖咋!
 
羅碧芝 Facebook Page
www.fb.com/gigilawpg
IG: gigilaw1113

COMMENT