2017/08/10

揀啱旅伴,比起去邊還重要

11284670_172811616001_2
 
網上資料圖片
 
去旅行去旅行去旅行,香港人最鍾意就係去旅行,最暢銷嘅書頭十位有七位係旅遊書,打份工咁辛苦,唔計劃去旅行,俾個短期目標自己,點樣捱住返工先得㗎!
 
去旅行嘅方式真係人人唔同,去嘅目的就真係都一樣,想精神放鬆,想開心!邊有人想去旅行去到精神虐待咁 ,想唔開心搞到嬲嬲豬?
 
做細路仔多數都無選擇,亞爸亞媽話去邊就要去邊,都係黐住屋企人去。到大個咗,讀大學威水識搵吓外快,儲到筆錢當然同男女朋友去吓短線拍拖仔啦!旅行拍拖,男女朋友之間嘅分歧,可以喺短短幾日無限放大,又或者透過呢段日子修復,各適其式。去完個旅行分手嘅,大有人在,因為旅行更互相了解,認定唯一亦有不少,男女感情可以好無厘頭咁就分手或者一世。
 
但講到同朋友去旅行,有時可一就會不可再,同邊個去旅行當然有選擇,但好多朋友式旅行,去完返到香港就大把故仔聽。有幾樣嘢如果你賴過嘢!你就會明揀啱旅伴真係好重要!
 
首先最多fr子投訴係,身邊個朋友仲唔願起身或怕攰,其實去旅行可以好hea,大家都係想relax,但呢個世界真係有人抑鬱癌上身,去到酒店就度度都話唔想去,又話熱又話無嘢行,最多夜晚同你出去食個快餐,咁去嚟做咩嘢?不如喺香港book酒店俾你瞓三晚啦!搭飛機咁辛苦!明明出發前講到好想去呢到嗰到,最後只想留喺酒店(無設施嗰隻呀)咁另一個真係多得你唔少!
 
另一款,大少爺大小姐上身又係好麻煩,一大班朋友,對食嘢或觀光一定會有意見分歧,出到嚟玩咪大家一人就一餐囉!有一類人,你唔就佢,佢可以搞到分頭行事,唔係和氣收場嗰隻,因為你唔係跟佢嗰套,佢當然會嬲啦!其實如果各有想睇或想食嘅嘢,點解唔可以開心見成分道揚鑣?而一定要踩低人哋想食或想玩嘅嘢,要說服全世界就你嘅決定呢?唔跟從就嬲,搞到氣氛差晒,真係搵鬼再同你去玩呀!
 
仲有款又係搞到麻麻煩煩,就係大頭蝦到爆嘅朋友,即係好鍾意漏低嘢呀、打爛嘢呀、唔小心唔見嘢呀、因為唔小心好容易受傷嘅朋友等等,呢類朋友係會將本來好順暢嘅行程,為你加上唔同嘅阻滯,將你嘅耐力同包容力無限提升,老老實實,如果成日要同個蠢到爆嘅人出去玩,都真係要心地好好,好好好好人先會有份無限忍耐嘅心。
 
而最衰格當然係嗰種,唔係數目分明嘅朋友,講真出到去玩互相俾吓消費真係無所謂,最重要大家開心,但係大數如機票酒店等,都真係俾返自己嗰份好合理呀,又真係有人話返到香港再計再找數,最後條數當然找唔到,人都找唔到囉!
 
以上嘅人大家都應該會遇過,自己可能都喺別人眼中係呢類人,所以旅伴真係人夾人好重要,即使佢無以上嘅缺點,但同你唔多共同興趣、口味或話題,去幾日旅行都會好辛苦。咁點選擇旅伴呢?直覺呀!有一類人你遇上就會好開心,每次見到都會心情好好,不妨邀請呢類好朋友同你出外玩幾日,千祈唔好選擇平時已經會黑你面呀,經常講嘢有意無意串你嘅嗰類所謂朋友,寧願無伴都唔好咁傻,呢幾日足夠佢背後講你成世呀。
 
羅碧芝 Facebook Page
www.fb.com/gigilawpg
IG: gigilaw1113

COMMENT