2017/08/17

唔好自殺

premature
 
網上資料圖片
 
你有無試過失去最深愛嘅嘢?例如親人、愛人、寵物、健康等等?每個人最重視嘅嘢都可以好唔同,但當你失去一生中最愛,你最珍惜嘅嘢時,你會發現世間上原來好多你以為好重要嘅嘢,都變得唔再重要,一切以為好垂手可得嘅,亦變得不再擁有。
 
錢無咗,你可以搵得返,最深愛最應該珍惜嘅,我認為係生命。每個人嘅生命都屬於自己,點樣去演繹條命點行,每個人都唔同。我曾經聽過我有個朋友講自己細佬。學壞咗,我問佢諗住點處理。佢話要做嘅都做晒,咁大個人,有手有腳,佢想死,唔通唔俾佢死?
 
的確又係,咁大個人,真係控制唔到你點樣對待自己嘅生命,無得日日夜夜24小時貼身跟住你,預防你做任何傷害自己嘅行為。
 
既然係咁,如果身邊嘅人或你本身想了結生命,我勸你留返條命,感受一次失去最親嘅嗰種痛苦,嗰份錐心之痛感覺先。
 
只要你真係經歷到同近親一次生離死別,發現留喺世上嘅人嗰種痛苦係無比痛楚,調返轉諗,自己走咗,身邊人都會承受同樣嘅痛。咁諗會唔會明白多少少,生命無咗就返唔到轉頭,只要世上有一個親戚或一個朋友都好,每個人都總會有人想念,即使係唔多聯絡嘅人,或者去到失去你嗰刻,佢哋會想繼續愛你。
 
好明白轉咗牛角尖嘅人會覺得,我唔想生存做咩要理人感受。其實你呢一刻有問題,當未有問題發生前,咪又係好地地。例如失戀,你未識呢個男/女朋友前嘅生活,都係咁過,點解要為咗唔愛你嘅人放棄自己呢?
 
又或者你覺得讀書好大壓力,父母唔明白你,你又不如諗吓自己嘅要求,係咪真係要讀好多書,一定要做某類職業先可以生存到?唔通讀唔成書就一定唔開心?開心一定要建立喺成就之上?有無諗過原來你笑得最開心嘅時候,可能係細個同父母去海洋公園,門票都係幾百蚊,喺香港做任何工作,搵幾百蚊唔難啊!
 
係咪一定要住大屋住私樓日日食貴嘢先開心?諗吓其實食咩嘢重要,定食嘢時你身邊陪你開心嘅朋友重要?其實你可以擁有好多快樂,唔同嘅朋友,唔同嘅玩意。
 
你亦可選擇放棄你唔喜歡相處嘅人或事,但就唔好選擇放棄自己條命,當你選擇得放棄,代表你心情好差,你最後階段嘅嗰種負能量及行為,即使你走咗,佛教話你會無限輪迴你最後自殺嘅行為。唔信呢個講法都代表你好大膽啦!咁做咩無勇氣走過呢一步呢?
 
有咩事,行去公園睇吓細路仔玩,回到起點,慢慢再諗出路,搵人傾吓,好多人,真係可以幫到你,就算無朋友,你將你問題打上去討論區,我唔信無人覆你,香港人雖然係八卦有時咀賤咗少少,但其實好多素未謀面嘅人都有愛心,總知最多咪咩都無,有咩輸?留返條命,就唔怕輸啦!
 
羅碧芝 Facebook Page
www.fb.com/gigilawpg
IG: gigilaw1113

COMMENT