2017/08/25

坐飛機最憎嘅嘢

134d000368dd42dbab79
 
網上資料圖片
 
話說自從做球證開始要成日坐飛機,相信除非你係大有錢人,否則通常都應該會坐經濟客位㗎啫。坐經濟位都唔會舒服得去邊,講真坐飛機對我嚟講都算係苦差,雖然就咁坐係到,咩都唔洗做,但萬一運氣唔好,成程機都幾難捱。
 
氣味篇
 
講嘅都係隔離坐咗個身形比較巨大嘅乘客啦,呢個都無辦法嘅,唔騷擾到我,一般都和諧共處。最慘係坐隔離條友有難聞到爆口氣,瞓覺又張開口,叫空姐俾口罩自己都無用,點都聞到,成程真係好想轉位又點知full晒!呢程機都真係非常痛苦,不過無辦法,唔通問佢食唔食香口膠咩?口氣難頂,香水味及體臭味更令人發癲,呢一類關於氣味嘅問題,好難解決,試過最勇一次係隔離個呀叔除鞋,一除臭到喊出嚟!嗰陣咸魚味到家陣都回味無窮,我鼓起人身最大勇氣叫佢著返,因為我真係想嘔啦!好彩佢好尷尬咁著返,我真心覺得難聞氣味令人好不安!
 
乘客篇
 
唔知點解硬係有人會搵個膝頭哥頂人張椅,好似我背脊無感覺咁,咁多數你起身叫佢唔好再頂佢都會收斂嘅!但有款乘客係,經常出出入入,出入都唔緊要,可唔可以用手扶我個位上面借力時,唔好chok同小心啲呢!一手抓起我嘅頭髮,我終於瞓到又俾佢整醒!我個頭又俾佢整痛,一次都算,係咁出係咁入,不停騷擾到人都唔覺自己煩!
 
而又有另一款人好鍾意不停咁大聲講嘢,然後笑笑笑,即係咁,無人唔俾你講,但細聲少少啦!成架機都轉咗暗燈大家休息,講嘢大聲到用咗個咪咁!癲咗呀?都唔理人感受嘅!呢類人抵俾其他乘客鬧,因為自己唔要面在先。
 
不過我就好少會怪bb喊聲嘈到人,bb控制唔到,但細路仔就真係要大人教,唔可以騷擾到人,家長就真係最大責任嘅!
 
Delay no more
 
相信無人鍾意delay,但香港出發嘅機十程有八程都會遲,遲飛最慘唔係等得耐,最慘係駁唔到下一班機,嗰種心情,係飛機度咩都做唔到,時間一分一秒流逝,好心急希望趕到,到完全絕望眼神死,都咪話唔迷惘!去旅行又掃慶,做公事仲慘,運動員或好似我咁做球證都會提早幾日到,但可能所有嘢要重新安排,大失預算!最後搞到身心疲倦,都咪話唔黑仔!
 
其實坐飛機都真係好睇彩數,有時好多嘢都控制唔到,只能聽天由命,長途機遇到以上事情嘅話,都唯有同機組人員求救,希望有個中間人幫幫手搞掂麻煩乘客,所以空姐空少唔易做就係咁解。
 
羅碧芝 Facebook Page
www.fb.com/gigilawpg
IG: gigilaw1113

COMMENT