2017/09/01

女人-就係煩惱嘅根源

1d622-bruce-lee-iphone-wallpaper-download
 
網上資料圖片
 
首先,開宗明義,呢篇嘢唔係想貶低女性,絕對無性別歧視。因為我都係一個女人,我內心深處係覺得女人好偉大,我都有呀媽生,女人所承受嘅生育之痛的確是無可比較。
 
入正題,女人,除咗你呀媽,無論你係男係女,喺香港呢個男女算好平等嘅社會嚟講,你身邊總有一兩個煩到你爆嘅極品女人!佢有可能係你女朋友、你呀妹或家姐、你上司、你下屬、你同事、你同學、你朋友嘅女友、你朋友、你嘅姨媽姑姐!總知,你一定會俾女人煩過,而且會好想好想打佢兩巴,你唔明白佢點解可以製造咁多不必要嘅問題出來,你亦唔明佢點解咁多時間煩住你!你只係想安安靜靜咁做個正常人,可惜,你逃唔出佢嘅五指山。
 
女人,最厲害嘅地方係,佢會自製非常多嘅煩惱,唔係講雞毛蒜皮嘅小事,佢自製嘅煩惱係好有奧斯卡劇情嘅水平。例如好似十優港姐做節目咁,呢個係一個非常好嘅例子話你知,女人要將一件事幻想到好負面時,嗰個程度係可以有幾咁投入,然後投入到好似已經發生咗喺佢身上,嗰種憂慮,就好似佢曾經生咗仔已經到40歲被老公拋棄咗咁,你睇,做節目做到可以喊晒口話覺得女人好慘,生仔後身型走樣,老公事業如日方中就會識過第二個。
 
唔講我以為呢個theory係一定會發生喺每個女人身上,anyway,批評呢個講法都浪費我嘅時間,每個人嘅人生點發展同點睇愛情不盡相同,只係想表達你知,女人係無論高學歷或低水平都好,要自我製造煩惱嘅,幻想空間勁過藝術家!
 
當男人睇一件事時,佢睇好多事實數據去推敲將會發生嘅事,例如佢會真係睇到個女朋友拖住第二個男仔佢先會有危機感,至於女人就會由結婚第一刻開始就會諗到最壞打算,如果將來老公點點點我就點點點,我身邊有超過8成女性朋友係會諗定對方將來出軌嘅處理方法。
 
咁女人可能會覺得男人信唔過,諗定都好正常,喺愛情方面其實你諗到天花龍鳳都係你兩個人嘅事,唔影響人就無咩所謂,唔通叫你唔好諗就唔好諗咩?但有時喺公司,如果你遇到好鍾意食西餅嘅女上司,咁又點算呢?
 
所以即使我係女人,我都鍾意喺男人堆到工作,快靚正,一就一、二就二,重點係男人睇結果多過過程,成件事搞掂,佢唔會太在意你當中枝節,唔煩亦係一個重點。同男同事合作得多,亦間接幫到我喺公事上改變自己,如何係爽快同有效率咁工作到位,幫到人又幫到件事係大前題。
 
好老實,要觀察女人嘅層次唔係只係睇學歷,最叻嘅女人係有耐性而且脾氣好,識得唔同時段作出合理嘅反應,呢種好似水造嘅女人,係我嘅學習目標,暫時都係見到真係1至2個女人做到,自問真係患有公主病,控制唔到情緒,要做到真女神真係難到爆,不過如果做到將自己製造出嚟嘅問題變成唔係問題,已經令整個人生輕鬆自在好多。
 
羅碧芝 Facebook Page
www.fb.com/gigilawpg
IG: gigilaw1113

COMMENT