2017/09/07

還我20年前嘅香港小姐競選

1400319584214_37FA410779EEFCA446004DB25BB10822
 
網上資料圖片
 
唔知大家有無睇今年香港小姐個決賽呢?我同好多女仔一樣,細細個都好鍾意搵張被扮冠軍斗篷,拎住玩具劍扮得獎,求奇戴個頭飾又當贏咗,總知睇港姐就會玩一餐!最鐘意笑容親切,有親和力同觀眾緣嘅港姐,自己最鍾意一定係譚小環同楊思琦!不過都講緊廿幾年前喇!嗰時港姐每年都有好多參賽者,有初賽有決賽,個舞台好大好靚,未選都會留意佢哋嘅新聞,然後成家一齊睇就會支持某幾個心儀嘅佳麗,幾開心㗎!
 
但年紀愈大,唔係對港姐嘅情意結有所遞減,而係當你成晚睇直播時,你睇完都唔知自己睇緊咩嘢,好似成件事好求其,咁就話選咗個代表香港嘅女仔出嚟,都真係感覺幾差,時代就不停進步,反而自己住嘅地方,搞嘅選美比賽就一直退步咁。
 
話說呀姐我都開始步入中女,喺職業上做過學校嘅歌唱比賽評判、小一入學面試考官等等、最近都開始做裁判考核員,所有關於人類嘅測試,要比分嘅項目,我以上嘅工作全部有評分準則。每次要去評一個人,我會好認真去睇大會個要求,再喺每個比分項目度睇吓佢嘅表現值幾多分。
 
我唔鍾意參加比賽時,個機構對我亂評分,用咁多時間為一件事付出,我相信每個人都希望自己有個公平公正嘅結果。就算喺小學校內嘅聖誕歌唱比賽,對細路仔嚟講,可能係兒時最難忘嘅回憶,即使咁細嘅比賽,學校老師都應該認真對待。
 
當晚睇港姐,十位評判講出心水時,俾人感覺就好似,我鍾意呢個,所以我就投佢一票,咁究竟?每個環節有無計分?又根據乜嘢準則去覺得一個佳麗比起另一位更好,我睇咗兩個鐘,參透唔到!
 
而8強選5強時,有3個最低分嘅佳麗要留一個入5強,搞完一大輪,原來5強選出嚟輪流喊住多謝父母養育之恩,講完就公布三強。咁夾硬入5強,排第5個個,其實有咩作用呢?原來一早都有三強名單,選5強做乜?
 
成個比賽你唔可以怪參加者、評判、司儀,真係要批評,就批評大會,訂一個咁嘅評分準則,而近年嘅評分準則亦不段咁改,將港姐咁多年比人嘅華麗美好印象徹底打破!
 
我好相信呢個年代依然有好多又靚又叻嘅女仔想選港姐,但最終無報名,個原因係,你永遠唔會知道,下年個玩法有幾唔公平,你亦唔會覺得,選完出嚟有幾咁巴閉;你更加唔會理解,能夠成為冠軍係需要咩條件!
 
香港,香港小姐,好老實講,一個連廣東話都講得唔清嘅女仔,問答環節完全以廣東話表達唔到想表達嘅意思,三強有兩個唔識中文,你叫本地薑情何以堪?
 
如果你覺得,算啦,show嚟啫,唔好咁認真,但唔認真不如唔好搞,你可以睇睇網友嘅反應,其實,好多人對香港小姐,係好有要求!
 
羅碧芝 Facebook Page
www.fb.com/gigilawpg
IG: gigilaw1113

COMMENT