2017/09/22

公審人反被審

CH6網絡成欺凌溫床
 
網上資料圖片
 
網上資訊太過氾濫,基本上每人每日都會拎住手機睇睇睇,用幾多時間上網當然好睇個人,平均每日相信加埋都唔會少過2個鐘。2個鐘可以睇到好多嘢,有人會上網買嘢、有人睇新聞、有人資料搜集…….總知有無用都好,上網就點都會吸收到唔同嘅信息啦!
 
當然啦!網上面鬧人真係唔洗本,唔洗負責任嘅,講乜都得。但最睇唔過眼當然係自己出個post公審人,點知成件事寫出嚟笑大人個口,有個女專欄作家,話搭的士個的士司機將車費加埋行李,收多佢幾毫子,話俾對方強姦幾毫子,又話呢個行業生存唔到要怪司機自己。
 
點知眼利嘅網民話返佢知行李係6蚊一件,司機係收少你幾毫子。其實做人就唔好咁鬼衰格,衰咗咪認囉,刪post後再出又要話人「毫」俾你難得,唔知加咗價!想點呀小姐,你出得post鬧人,你一係就道歉呀嘛,邊有得咁茅,仲話自己專欄作家,咪教壞人先得啊!
 
揸的士得罪你咩?又要搭又要先入為主歧視的士司機,最討厭人未了解清楚就先歧視,你咁叻你考到個的士牌先講嘢嘛!未熟價目表就公開批評成個行業,未免太唔講道理啦!
 
有時睇到網上跟車太貼嘅case,搞到非常樣衰,例如近日參加美國talent show嘅小妹妹Celine咁,佢協助視障選手行出去,就俾人話佢聽錯以為自己入圍。因為佢之前種種新聞令到佢喺香港嘅網評非常差,今次未有人幫佢澄清前就有幾百個留言係咁笑佢鬧佢,其實就咁睇條片都睇到佢一拖完人出去就返轉頭,但有一班人就無論呢個小妹妹做咩嘢都好,都會鬧咗先。
 
呢個page嘅主理人一知道自己批評錯咗Celine,即時作出道歉,係咪因為page唔係用真人身分開,所以有勇氣面對錯誤?我反而覺得,用真人開page更加要有承擔,你講嘅代表住你自己,鬧錯人咪認囉。
 
羅碧芝 Facebook Page
www.fb.com/gigilawpg
IG: gigilaw1113

COMMENT