2017/09/28

買 FIFA18 最強理由

2017_09_28_Gigi MenClub Column 1
 
網上資料圖片
 
各位巴打,FIFA18開售啦喂!有無人好豪氣買咗C朗版玩先?我師奶仔當然唔捨得,等多日買平版算啦。買game嚟講,因為我係女人,買嘢唔洗原因。但你哋有女朋友或老婆嘅兄弟,會唔會買隻game都俾人哦,會話你又買game?當然,首先你要有女先啦下話。無嘅話你買多幾隻game又何妨!
 
其實睇返FIFA18嘅玩家分享,雖然好多遊戲網頁未出前就講到天花龍鳳,又咩畫面更靚更立體呀!慶祝入球動作抄返原本個人物,即係像真度更高啦。點知玩過之後,好多巴打都話同17差唔多,有某幾個球星仲整埋容。不過唔重要,無論改成點,我同你都會買,如果你女友咁醒識串你話17同18打落咪又係一樣,只要你答返佢,等如佢買名牌化妝品,出隻新唇膏,係個包裝唔係好同,搽出嚟老老實實咪又係一樣色,而睇個個完全唔覺有分別,佢都會買多支一樣。
 
全新FIFA18嘅盤球操作方法會更精準,即係玩落會控制得更好,代表玩落更加過癮。咁就好似女人發現唔同型號電飯煲呀、電子燉盅或電磁爐一樣!隻game更實用更發揮到玩家要求,咁買新版都好合理,無理由個個兄弟識新技術自己唔知對方講緊咩,你話有無道理先?你估買隻game唔洗練,真係要好似溫習咁熟能生巧,打機好過花時間玩手機交友沙沙滾,所以醒目嘅女人一定會俾男人買新game!
 
2017_09_28_Gigi MenClub Column 2
 
網上資料圖片
 
玩Alex Hunter對我嚟講算幾好玩,因為我屎,可以玩好耐,好多兄弟好快都爆咗17,所以出18繼續發展落去,都有唔錯嘅育成感。未必個個鍾意玩故事模式,不過我成日覺得玩故事模式嘅人都有耐性同長情,就好似女人鍾情某品牌嘅手袋一樣,基本上個個款都差唔多,但又要買幾個,但你買隻game普通版5舊水內,佢就點都過千,講真你算係好低消費。
 
以上都唔係最強嘅買新game理由,其實,最重要係一班老友齊上齊落,大家都買,晚晚約埋連線同世界各地嘅球隊比賽升division,咁偉大嘅情操,透過互相對罵增加友誼值,呢個咁重要嘅晚上約會,點可以缺席?唔洗理,幾舊水買到快樂,邊個想否決都無情講!
 
P.s.嚟緊10月尾出刺客教條:起源,加上太鼓重生,呢兩隻我都會入,仲有無邊隻game大家覺得好玩必買?留言分享吓呀喂!祝各位有個Happy October !!
 
羅碧芝 Facebook Page
www.fb.com/gigilawpg
IG: gigilaw1113

COMMENT