2017/10/06

男人都是被迫長大

2017_10_04_Gigi MenClub Column
 
網上資料圖片
 
有無聽過咩叫做「媽寶」,即係永遠都係媽咪個寶貝,可以唔洗長大,有人照顧。當你仲同屋企人住,你開始打工,父母多數都會盡量照顧你起居生活,例如屋企清潔、洗衫、煮飯、煲湯等等,總知放工返到屋企,王子病發作,你親愛的媽媽一定唔會怪責你。
 
然後有個女朋友進入你生命,你發現你開始多咗個好有要求嘅呀媽,甚至乎衰少少講句,多咗個有病嘅呀媽,所謂病係公主病加精神病。除非你內置有「照顧系統8..0」,否則本身由咩都唔洗煩,跳到去樣樣幫女朋友決定呢樣嗰樣,被迫升呢由「宅男」變做「暖男」,呢個關口就夠你個個星期總會有一兩次嘈交。
 
到踏入談婚論嫁階段,勁啦,你又要再upgrade,因為普通暖男層次已經滿足唔到港女要求!正當人人都放閃上Ig同Facebook求婚,老老實實,有幾多個唔係傾咗幾時結婚或訂埋酒席先補返求婚儀式先?雖然喺你心目中都係拎嚟搞,唔求婚又怕個老婆記你一世,呢一關係迫你學買鑽石,一世人可能買一次鑽石,你心諗俾幾皮嘢出嚟都唔知為咩嘅同時,又要去學點樣買鑽石。唔買都唔知要睇咁多資料,又咩色澤、切割、形狀又淨度又盛。
 
拎咁多錢出嚟,想買大粒少少原來幾萬蚊要大粒就要買到S後嘅colour。買得唔好又怕俾女朋友話,呢一次你即使覺得搵錢咁辛苦,買粒咁嘅嘢唔係好抵,又唔知邊個做壞規矩,喺呢個年代搞埋晒求婚放上網,搞到家陣人人都要頂硬上,因為,你就快做人老公。
 
做人老公已經損失咗媽寶權,你老婆要返工嘅話,佢會要求同你分擔家務,你開頭笑吓笑吓過到關,點知佢發火將你唔做家務嘅事放上網公審你,務求用群眾壓力迫你就犯,你唔再好似以前咁,話踢波就踢波,打FIFA就打FIFA,有埋小朋友的話,除非你本身係超鍾意細路仔,否則你每日好似為別人而活。
 
女人有小朋友,往往可以不惜代價照顧親生骨肉,而男人,又有幾多個真係唔想要私人空間?女人成日話要公平,其實男女無絕對嘅公平,因為天性已唔同,如果大家負責喺屋企角色上定到專長,負責唔同項目,男人嘅長大過程,係被女人迫到成長,定係協助長大,就真係睇女人功力。
 
如果你唔想下半世,日日被人迫,搵老婆真係搵清楚,因為你嘅人生好可能會被一個女人影響得好重要。
 
羅碧芝 Facebook Page
www.fb.com/gigilawpg
IG: gigilaw1113

COMMENT