2017/10/13

神奇球隊—冰島

2017_10_13_Gigi Menclub new2017_10_13_Gigi MenClub Column 2
 
網上資料圖片
 
以前睇波,除咗香港隊,最鍾意就係阿根廷,原因好簡單,因為鍾意美斯,不過因為喺足球界度認識咗一位阿根廷人後,覺得條友好串,所以就無咁鍾意呢隊波。係咁㗎啦,女人係小器,唔得咩?
 
反而由2016年,留意到一隊神奇球隊,呢隊波過5關斬6仗咁入到歐國盃半準決賽,大家都知我講邊隊,就係冰島喇!佢之前又歷史性打入世界盃決賽周,媽呀!得33萬人口嘅球隊都打到入去世界盃決賽周!真係令人好鼓舞,好震撼!
 
上年我開始留意呢隊波,然後有機會喺中國舉辦嘅女子國際邀請賽,做到冰島女子國家隊嘅賽事,真心覺得佢哋嘅人nice,所以4月去旅行時專登就去一次冰島。雖然去到又唔覺得佢哋好熱情,但好難得除咗遊山玩水之外,咁啱住嗰間房望到有個足球場,睇到有班人著藍衫好有系統咁練習。
 
佢哋練波人唔多,當然我唔肯定係咪國家隊,但係嗰種天氣,4月我著小件衫都凍到嘔嘅情況下,見到人可以輕裝踢足球,都覺得好神奇。佢哋住慣咗凍嘅地方,好似無咩怕凍嘅感覺,當然如果換轉佢嚟到我哋主場,一定會熱到痴肺。
 
回望香港足球,其實好多人都仲係好支持香港隊,好多人鬧,但都係出於愛之深責之切,當中有部分為鬧而鬧就唔洗理,因為有班人喺改革後,唔再能夠從唔同方式偷偷摸摸拎著數。至於,有句說話「ban橋俾橋」,有球迷嘅批評亦會係整個足球圈改善嘅推動力,但批評之餘都可以講建設性嘅提議,唔好一味鬧,負能量到爆,做嗰班人想做好都俾人打沉啦!所以有好嘅就支持,例如對馬拉贏2:0,你估咁易?
 
Anyway,冰島足球真係令人充滿希望,香港足總亦有同佢哋搞交流。喺佢哋身上學習吓以有限資源做無限成績,最重要其實係有可能,大家自己人,一個字「撐」!我期待亞洲「冰島」故事,由香港上演!
 
2017_10_13_Gigi MenClub Column 3
 
羅碧芝 Facebook Page
www.fb.com/gigilawpg
IG: gigilaw1113

COMMENT