2017/10/20

最可怕嘅酒店

single-women-travellers
 
網上資料圖片
 
諗返十年前,我去旅行住酒店最怕一個人,細個(好似得中三)跟父母去韓國,試過一晚一個人一間房,嚇到成晚唔敢瞓,我就好驚驚。其實無鬼㗎,我自己迷信好驚咁囉。到今時今日,真係無諗過,出咗嚟社會工作,公幹就最好一個人一間房,唔好話同好熟嘅朋友一間房,去外地要做正經嘢時,忙完一日,返到房真係想放鬆,唔想再講嘢。
 
依家嘅我,已經去到一個人搭飛機,一個人住酒店都無感覺嘅地步,可能你會覺得,有咩咁巴閉,但見證住自己呢段時間嘅成長,會覺得歲月真係迫人長大。(姐姐老了T_T)入返正題,去到酒店,依家已經唔會主動去驚鬼,除非真係有異樣,否則都一覺瞓到大天光。
 
可能間中神經緊張會有發惡夢或比鬼壓咁,但第二日又咁忙都無咩時間處理返前一晚瞓成點,最重要係瞓到。鬼,都真係無咁多,所以住酒店最驚都真係唔係鬼,關於酒店,最可怕嘅事第一位,一定係無wifi!
 
我習慣用酒店wifi做嘢,唔會買電話卡,一來懶,二來做嘢時都無時間望電話,咁返酒店先覆email同message,又慳錢,心諗有wifi就掂晒啦!點知,酒店幾靚都無用,最驚係佢wifi唔穩定,連到但上唔到網,有時又登入錯誤,煩到爆!一到埗去到酒店想同屋企人報平安,點知個wifi跳晒掣,都咪話唔嬲。
 
算啦,無wifi,你想舒舒服服開個大都唔得,第二個最可怕係,廁所沖唔到廁!呢個真係經典,去完大沖唔到廁,想點先?有朋友試過真人真事,一沖,湧返晒所有廁所水上嚟,成地都係臭臭,講真,雖然可以即時換房,但真係好嘔心。
 
有次去蘇格蘭,諗住凍到爆沖返個靚涼,點知個熱水爐又古古怪怪,最後搞勁耐都無熱水,變咗沖凍水涼,夏天去東南亞我都頂到,但冬天真係搞唔掂,除晒衫先發現無熱水又麻煩,所以對我嚟講,第三個最怕嘅係,冬天入住嘅酒店唔夠熱水沖涼。
 
如果你唔食煙,會對煙味好敏感,有無試過入住成房煙味嘅房,話換房又話要第二日,當晚真係臭到想作嘔,你用盡所有方法要求換房而無得換嗰一刻,個人會灰到爆,有好心同事借房俾你瞓地下,你都唔介意,始終氣味嘅嘢,好難頂到長時間!
 
住酒店真係好多千奇百趣嘅事,你未遇到係好彩,有時去落後國家無得選擇,成房昆蟲四腳蛇,換房可能條四腳蛇仲肥,成間酒店都係咁嘅時候,你可以點?
 
所以,每個人嘅勇氣加獨立,多數透過你工作嘅經歷訓練出嚟,去旅行有得選擇就當然住好食好,但工作嘅嘢,你懂的!
 
羅碧芝 Facebook Page
www.fb.com/gigilawpg
IG: gigilaw1113

COMMENT