2017/10/27

個個都俾晒人工老婆,你估個個都想俾咩?

images gigi
 
網上資料圖片
 
話說早前到內地做嘢,同國內男性朋友傾開家用問題,俾幾多家用老婆同屋企,其實都好講唔同人唔同情況。佢哋笑其中一個朋友將所有人工俾晒老婆管,講真,唔好話國內啦,香港都有大把男人係咁,不過係咪個個都真心無所謂,真心願意咁做,就另一個說法囉!
 
有一種男人係天生被老婆食住,一結婚之後,被訓練到將所有人工上繳中央,佢哋嘅心態不外乎都係責任感呀、俾老婆安全感呀等等。
 
佢哋老婆其實都無所謂,你主動放,當然樂意收歸國有,好好幫你管理財務,令家園有一個可持續發展空間。男人主動上繳,你情我願,俾班朋友知道,最多咪笑兩吓。可能佢真係好愛佢老婆,覺得咁做好甜蜜,你理得人咁多呀!
 
但大家身邊,有無發現,永遠都有一兩隻「死狗」(唔好意思,真係要好粗俗咁形容),次次出親嚟食飯吹水都大吐苦水,情況大概係,聽到人話買電話、買game、買鞋、買呢樣嗰樣時,佢就會即時變灰色,因為佢無得買,無錢咁話。
 
心諗你咁大個人點樣無錢?明明都好似人工唔錯,原來話說佢結婚之後,被老婆要求幫佢管人工,為咗第時生仔、供樓、買車等大計,佢聽完覺得好似幾合理,好唔小心應承咗!
 
自此就出晒事,每次出糧後好似要問人乞零用,香港地食餐飯都貴過人,扣咗車錢飯錢,佢完全已無多餘錢買其他嘢!佢每次一開口問中央申請批核,會換嚟:「你咪有囉!又買呀!」最後可能俾你買,但黑口黑面說話多多就無意思啦!
 
自此呢種男人就會變成,出到嚟「死狗」樣,返到屋企就另一個樣,唔敢表達。好老實,女人想管你嘅錢,一來為家庭係真,但大部分都有個概念,就係,覺得你無錢就唔會身痕。唉,其實男人要身痕,佢點都有方法,只不過唔會俾你諗到用咩方法囉!所以話,除非你係對生活無咩要求,又無咩個人嗜好,每日只係除咗返工都圍繞住你老婆嘅話,你都唔好咁傻唔守好條底線。
 
有時關係破裂就源於你第一步行得唔好,俾唔夠空間大家去處理自己嘅私人嘢。每個人都獨立個體有自己嘅喜好,要完全掌握他人財政,絕對唔會令關係變好,被對方管理嘅伴侶亦有朝一日會變。
 
有得回頭就回頭是岸,無嘅,祝施主繼續好運!嘻嘻!
 
羅碧芝 Facebook Page
www.fb.com/gigilawpg
IG: gigilaw1113

COMMENT