2017/11/03

追唔到女仔,有無檢討吓自己?

2017_11_02_Gigi MenClub Column 2
 
網上資料圖片
 
好多港男成日投訴追唔到女仔,其實大家有無諗過問題出咗喺邊度?老老實實,首先我哋將香港女仔分咗兩批去探討一吓先,我就比較貼地,身邊大多屬於第一款嘅女性朋友,好多都係玩開運動,思想直接簡單嗰批,第二類呢,都有少數會出去wet啦!去飲酒啦!所有嘢用名牌啦!鍾意識有錢人等等。
 
你問我呢,我當然會覺得第一款普通港女做女朋友或老婆係唔錯選擇啦,雖然未必成日會著到好靚好花姿招展咁討好你,但其實唔化妝都見得人嘅又有幾多個?如果佢唔太化妝但出街唔嚇親人,你都執到啦!
 
咁你問我,呢款女仔難唔難追?講真,你如果有用個腦加埋心機去試,點都會俾你遇到,首先你要求咩嘢先囉。你又唔太主動,又要驚呢樣嗰樣,係女仔同你傾多幾次都唔想再傾啦吓話?
 
想同第一類心儀女仔打開話題,教你幾招啦!第一,無論佢幾咁唔打扮都好,基本嘅護膚都會有少少要求,你可以從防曬同佢傾吓計先,因為每個女人都認為防曬係超重要,無論幾多歲,無乜邊個鍾意自己曬黑出雀斑,你得閒問定你班八婆同事或呀媽家姐細妹,邊隻防曬好用,搽身同面又有唔同,水貨邊度買平等等,傾多兩句你買支防曬送俾佢,包對你有好印象!
 
然後就可以再留意吓佢,邊幾日面色好差,一陣又話肚痛又盛,你就可以把握機會買暖包、熱水袋、止痛藥、熱朱古力等等,佢一定會覺得你好細心,雖然嗰幾日女士心情好差,但有個男仔對自己咁體貼,咩痛都唔記得啦!
 
以上都係入門例子,其實喺成個過程入面,最大忌有你講無人講,你應該係慢慢了解佢嘅喜好、習慣同背景等等,唔好只係將自己嘅嘢講晒就唔做聆聽者,互相交流都好重要。有類男仔一味就講晒自己要求,完全好似手機上台出卡咁,講晒你聽佢有咩優惠,願者上釣咁,呢一批就最好係有錢仔搵返第二類只愛金錢嘅女人較好,明買明賣,貼地港女並唔會因為你有錢而屈服。
 
男人最緊要知道自己能力,定個方向,先好考慮追求唔同種類嘅女仔。你好有錢或無錢,你要真愛的話,你唔會諗住喺飲酒嘅地方識到老婆啩?如果你真係普普通通想識個貼地女仔,咁就要留意自己付出幾多心機去了解對方先,追女仔都要投其所好呀!理得你之後變成點,一開頭連少少資料搜集都唔做,死得啦!
 
至於最後有種男人,玩家層次,鍾意第二類嘅所謂高檔女生,日日唔化妝唔用名牌就唔見得人嗰批,你哋係玩家唔洗人教啦!愛情對你哋嚟講,戲嚟㗎啫!
 
羅碧芝 Facebook Page
www.fb.com/gigilawpg
IG: gigilaw1113

COMMENT