2017/11/10

高學歷唔代表有智慧

Lady-taking-video
 
網上資料圖片
 
大家有無留意,每隔一段時間,就會有女人報警話喺網上被人呃咗幾百萬!網上情緣嘅嘢我真係唔曉,次次睇親類似個案,我個腦就有好多問題湧出嚟!
 
首先,我會諗點解個女仔會咁多錢,唔係幾廿萬,係幾百萬,分十幾廿次過戶去咩海外,乜有人分十幾次問你拎錢周轉,你又唔諗吓自己有無得周轉㗎咩?究竟本身女事主係好有米定點呢?不過咁多單都睇到,當騙徒唔再出現,個女人發現爭人周身債時,就報警求助,可惜,警察都幫唔到你啦已經!
 
咁多單報導都有提及係海外騙徒,通常講到自己係鬼佬又做好勁嘅職業,咩工程師或者建築師等等,用英文同香港女仔傾吓計,傾傾吓就話做你男朋友俾好多承諾呀咁。每次都留意到報導都話女事主高學歷或喺大企業做,即係本身有一定學術水平啦!咁因乜解究又咁蠢俾人呃到錢?
 
嗱!高學歷嘅人,身邊都唔少,但我發現就算本地讀完三大出生嘅大學生,都真係唔係個個醒。讀書叻等唔等如做人叻?我話你知,一定唔成正比!你心諗你夠知呀嘛!係啦,我哋有嘅係人生閱歷,當呢類人日日刨書嗰時我哋可能搵part time見緊世面,佢喺屋企就公主病上身,當佢大學畢業第一份工就做到變中女,識嘅朋友都係來來去去嗰幾個(幾個都唔知有無)!咁呢,呢類人就大鑊啦!
 
基本上個圈子又遇唔到男仔,網上或手機Apps識咗個鬼仔後,又要祟洋,以為搵到真命天子,但人都未見過,就活咗喺童話世界到!大家意唔意識到呢類人幾咁空虛同寂寞?用文字就可以欺騙到情感同金錢,只要時間,俾耐性,魚就游埋嚟你口。
 
所以,無論一個人有幾高學歷都好,永遠最敵唔過孤寂,特別係女人,即使再叻嘅女人面對愛情測試,都可以輸得一敗塗地。
 
寫呢篇嘢其實就唔係想再落井下石嘅,希望女人睇到,會引以為鑑,唔好再為咗小小嘅文字安慰,就咁易信人。至於男人,唔好咁衰呃女人錢同情感啦!真係見過幾個女人因為俾男人呃晒錢癲咗入青山,癲到樣都變晒,好地地由一個青春少艾變到係咁食精神藥物,食到水腫加講嘢唔協調同身體好唔健康。
 
做人真係積陰德呀,男男女女都好,一心呃人錢嘅人,有報應㗎!
 
羅碧芝 Facebook Page
www.fb.com/gigilawpg
IG: gigilaw1113

COMMENT