2017/11/17

足球場上睇人生百態

周星馳足球
 
網上資料圖片
 
足球場真係一個好神奇嘅地方,可以透過一個足球學識好多嘢!唔係因為個足球,我都未必見識咁多。
 
因為足球多人關注,所以會有好多新聞,無論海外或本地,總知關足球事,都佔體育版好多版位。喺平常生活入面,點都會聽到人提及足球,足球的確係好普遍,而呢個足球世界都變得好快,人生百態乜都睇到,真係學到好多嘢!
 
無一世敵人
 
足球場英雄地,無論咩身分,成場波打晒交或者火藥味濃都好,你見到嘅又未必係真嗰面。親眼見過好多次,兩隊球員賽前攬頭攬頸,一開波就各為其主,即使場波嘈到拆天,完場又會握手言和。而球證同球員好多時表面好似敵對,其實大家都知面嗰層同底嗰層都係身份唔同,警告球員時,球員亦作出相對反應。可能賽事中間因為球員身份關係,唔會信服球證判決,完咗場大家都知當時發生咩事,會變返好理性,甚至有球員私底下會向球證道歉。
 
現實生活中,都有好多人表面好似好不和,實際原來劇情需要,所以喺社會做事,都要學識保護自己,凡事唔好睇表面,因為你唔會知人與人嘅關係,個變化可以變到幾咁複雜。
 
東家唔打打西家
 
轉會喺足球世界幾咁普遍,今年曼聯下年踢皇馬,魚唔過塘唔肥,轉公司離職就日日都有發生,所以當你效忠一間公司時,做嘢或講說話都唔好去到咁盡,有實力就自然有人賞識。好似球員咁,萬一老闆突然唔鍾意,放你出大海,你無岸靠就好大鑊。有類人好得意,以為世界唔會變,今日老細好睇你,覺得有風洗盡(巾里),除非型到呢個老細唔再幫到你時你裸辭都無問題,否則都係專心做好份內事,四圍唱對家點火頭,搞是搞非最後一定得不償失!
 
等一個機會
 
當你踢青年軍時,即係做新人,一入職,對上已有無數咁多英雄,好多大哥有唔同嘅豐功偉績。如果能夠一炮而紅,當然戥你開心,但千祈唔好覺得贏晒全世界,因為大把人經歷過你而家面對嘅事。過咗就變得平淡,新聞人氣並唔會日日圍住你。學識從前輩身上偷師,佢哋衰咩就唔好學,路就行得快啦!
 
若果運未到你,咪繼續努力,唔好諗住埋堆就幫到手,小恩小惠人哋幫到一時,幫唔到一世,就算入到大球會,落場踢嘅都係你雙腳,無實力始終會露底。何必唔好好儲經驗,一有機會就表現人前,靠埋堆擦鞋上位嘅,俾你升到上去都會跌返落嚟!
 
踢波靠雙腿,人生路係自己行,雖然話順唔順好睇際遇,但有句說話「性格改變命運」係好到肉,踢得好嘅球員,有時性格導致吓吓俾人趕出場,再加上有啲喺場外搞是搞非,影響埋發揮,最後都唔會有大球會要,其實,做人或踢波,都係咁上下!
 
羅碧芝 Facebook Page
www.fb.com/gigilawpg
IG: gigilaw1113

COMMENT