2017/11/24

甩頭髮嚟講

2370185479_79422cc8c5
 
網上資料圖片
 
我有好多男仔朋友,好多都好玩得,好搞笑,同男人傾計大多數都係足球啦、打機啦、車啦、樓啦、股票啦、身型啦、女人啦等等,以上題目任講唔嬲,即係你可以笑佢踢波屎,笑佢哋大肚腩,但我發現,大部份男人都對一樣嘢比較保守,都唔多會主動同女仔分享。
 
嗰樣嘢就係,甩頭髮喇!話說,好多男仔廿幾歲仔就開始甩頭髮,有部分更一去到廿到尾就成個呀叔咁!M字額都好啦!有人真係光頭,老老實實,後生仔有頭髮邊個想光頭呀?
 
其實好多女仔都狂甩頭髮,本小姐係其中一個,一洗完頭頭都未梳,成手都可以係頭髮,頭髮愈長,甩得愈多,日日咁甩我都好擔心會變光頭,所以都開始研究咩方法可以甩少啲,我試過用天然洗頭皂啦、天然何首烏洗頭水啦、髮膜啦、焗油啦、總知咩都試下,但天然嘢用喺女仔長頭髮度都搞唔掂,始終會令到頭髮無咁柔順,梳唔到,又係甩。
 
但天然產品又的確會令頭髮變硬,所以推介俾男士用就較適合,有幾個比較好老友嘅男性朋友,開頭我都唔敢話佢少頭髮,但有次佢俾男仔朋友圈抽完水咪順便口快快推介佢用天然嘢,點知用咗又得!
 
無心插柳下,佢嘅頭髮就愈來愈硬,開始收復失地,我都為佢哋開心嘅,但自己就依然日日甩一大堆。
 
我對女士護髮就仲未好有心得,但聖誕節就到,其實如果你女朋友係長頭髮,你又要買禮物嘅話,不妨可以考慮去頭髮產品專賣店到買吓護髮產品俾佢!基本上十個長髮女人十個甩頭髮甩到癲,生完仔更加!唔係因為嫌佢甩頭髮,純粹係佢又唔捨得幾舊水買支洗頭水嘅時候,你咪喺聖誕做吓貼心暖男,送份好嘢過佢囉!
 
講真,如果支嘢work,佢晚晚洗頭就會諗起你對佢有幾好,即使你激嬲佢,沖完個涼洗完頭都消咗氣啦!
 
你唔信女人就係咁易氹?試吓囉,如果你女友咁巴閉唔受,咁佢都唔係簡單料啦!咁你留返啖氣暖肚,同佢去嘉年華燒錢算啦!
 
羅碧芝 Facebook Page
www.fb.com/gigilawpg
IG: gigilaw1113

COMMENT