2017/12/01

如果有得返轉頭

告白夫婦
網上資料圖片
 
近日呀姐睇緊一套新韓戲,我知我知你哋男士們無興趣㗎啦!唔係想推薦你哋睇,係想分享吓個故事,都幾有趣。
 
呢套叫「告白夫婦」嘅韓劇,講述一對夫婦由大學開始拍拖,結婚幾年後生咗個仔,種種誤會同性格不合導致佢兩個搞到離婚,兩者都表示好後悔同對方結婚,覺得互相害到大家人生好坎坷。
 
然後離婚嗰日,神奇嘅事就發生喇!佢哋突然間瞓醒時各自回到過去,返到未開始拍拖嘅大學生活,大家依舊存有咁多年嘅回憶。男女主角當然好憎對方唔想再重新開始,亦有好多機會做番之前後悔無做嘅事。
 
大家人生到咗呢一刻,應該有唔少人會後悔當初選擇錯誤,其實同唔少結咗婚嘅男男女女朋友傾開計,因為結婚特別係生咗仔嘅人會好多轉變,變到無朋友、無私人時間、無娛樂!重點係已經無夢想可言,呢個時候,佢哋會好苦口婆心叫未結婚生仔嘅人諗清楚。
 
雖然有一半人會補充「生仔都有開心嘅嘢嘅!」但有得俾佢哋再揀,佢哋都未必咁行呢條路。或者未有小朋友時會同另一伴去多幾次旅行或享受二人世界先。而家佢哋每日用咗好多精神返工,放工都要照顧小朋友時,又要諗佢哋讀書考學校,好多都好大壓力好辛苦!
 
當然時間無可能回到過去,呢篇嘢想提醒未有老婆/老公同仔女嘅朋友,問多啲結咗婚有細路嘅朋友感受,聽吓個轉變有幾咁大,有晒心理準備先好決定,否則會後悔嘅,都係自己,一世人,有啲嘢決定錯,真係可以影響到你成世,可以好大鑊!
 
睇路呀,各位兄弟姐妹!
 
羅碧芝 Facebook Page
www.fb.com/gigilawpg
IG: gigilaw1113

COMMENT