2017/12/22

最賴嘢嘅聖誕禮物

2017-12_22_gigi menclub column
 
網上資料圖片
 
聖誕節去開P係常識呀話!平時咁大壓力,終於年尾有個假期有機會同班朋友玩吓食好嘢,叉個靚電迎接新一年啦!
 
去開party當然唔少得抽聖誕禮物,聖誕禮物嚟講呢,我嘅朋友圈都比較貼地,價格限150-200蚊內,比起5至6年前100蚊內就加大咗個範圍,原因都好簡單,100蚊家陣都真係買唔到咩好嘢,咁又唔會上到500蚊一份,依家呢個價就最適合喇!
 
話說咁多年嘅抽禮物環節我都積極參與,非常用心去選購禮物㗎,但次次都被彈到一文不值,實在太令人氣餒,有時買得最衰嗰三條友要罰成舊水,我當然榜上有名啦。買禮物嚟講,又要睇嗰晚個圈子大多數嘅成員係咩人,呢個又話唔好,個個又話唔鍾意,真你諗到頭爆。
 
總結過往咁多年嘅失敗經驗,我得出最賴嘢嘅聖誕禮物有以下幾款:
 
1.護膚品
唔好以為女仔圈就必定like護膚品呀!因為每個人用嘅牌子唔同,你覺得好用又唔係個個啱用!有次收到盒面膜真係用唔著,皮膚用嘅嘢,都係自己買最合適,送禮抽獎就盡量避免啦?
 
2.衫褲鞋襪
咁我班中學同學細細個一齊跑步大,之前個印象仲停留喺中學時大家身型一樣嗰個階段,咁咪買件靚靚運動風褸做禮物囉!點知,幾廿年後,大家原來已著唔落當年個碼,成晚我就俾人話好買件咁細嘅褸,我都係想喚起兒時記憶鼓勵大家做運動,又衰咗!所以,關於碼數嘅嘢,算吧啦!
 
3.食得落口嘅
有一年有人夾咁100蚊軟糖嚟抽獎,我睇到當堂打個突,好彩抽唔中。然後第二年我唔知點解咁黑抽中瑪黛茶!大家聽過咩係瑪黛茶未?我就真係睇到個樣都唔會飲,直情覺得垃圾都不如,係咪要咁衰買盒完全無人有興趣嘅茶去做禮物先?我都唔明,換轉自己收返好開心咩?食落口嘅嘢,除非貴到喊嘅鮑魚海參,否則100至200蚊嘅,買補健品又唔知人哋食唔食,零食又未必合口味,人哋都係想開開心心拎樣滿意嘅禮物,最後浪費又為乜呢?所以食落口嘅都係買俾自己算啦!
 
其實以上三樣都係大路出事嘢,大家發晦氣可能會話:「咁買現金券囉!」講真我最憎收現金或現金券,咁不如你唔好玩囉,買現金券做咩呢?我無錢咩?洗咩你將錢變做一間公司嘅券換俾我?咁無誠意嘅我真係會反晒眼,大家都係笑吓開心吓,除非150至200係限額,你出夠500蚊買有用嘅超市現金券,咁就唔同講法,否則你又要一齊玩又要無誠意你就咪出席啦,破壞晒個氣氛!
 
羅碧芝 Facebook Page
www.fb.com/gigilawpg
IG: gigilaw1113

COMMENT