2017/12/29

最憎人消費年紀及細路去博同情

2017_12_29_gigi menclub
 
圖上資料圖片
 
話說香港地人多車多咩Q都多,講真次次搭巴士除非總站上車,否則都要博吓運氣希望有個位坐吓。搭公共交通公具嚟講,我唔介意自己個站無位坐,但我好介意一樣嘢,本身係有位但無得坐!
 
呢個世界就人人都自私,但自私極,都唔可以用自己個袋呀,行李呀,霸晒所有位,你有俾錢我有俾錢?點解你抱住個細路佢瞓咗覺,你將所有袋放去下層對面嗰兩個位,人哋想坐你完全無視,扮睇唔到多人。其實一上車都要知自己嘅物品點處理,無咩人時,你放都算,但擺明繁忙時間,架車勁多人時,呢類自私嘅家長,就利用自己有個細路仔,去扼殺其他人可使用嘅公共空間。
 
當人哋主動讓你,係對方出於自願,見到你要幫忙幫吓你,心地好並唔係要接受你自私嘅行為!如果將來自己坐車抱住個細路,對方又放滿袋唔拎走俾你坐又得唔得?
 
有一類老人家亦係恃老賣老,香港人傳統上大部分人都敬老,亦會表面點都分吓尊卑,好多人都樂意主動幫老人家或讓老人家出入先。但有類老人家就好離譜嘅,例如佢要執紙皮,成架車會亂喺鬧市到推,唔會理其他人安全,車到人重要大聲夾惡。其實條街就唔係你嘅,你慢慢推,小心唔好整到人,咪相安無事,但當中真係見過有種老人家整到成條街好污糟不單止,架紙皮車車到人又唔理,整花人架車又當無事,講真,真係唔係全世界圍住你轉。如果跌咗紙皮,有好心人幫手執,係人哋主動幫你,但唔照顧其他行人安全就好唔要得囉!
 
講真呀,坐車,如果無事無幹後生仔都真係應該讓坐俾有需要嘅人,呢個係人本身嘅教養,例如讓俾大肚婆或老人家咁。但我好唔認同一樣嘢,唔讓就要置人於死地放上網俾人鬧!大家都返工返學攰到隻嘢咁,有時加上唔舒服食咗藥,睇樣你唔會感覺到對方可能身體都有毛病,所以先讓唔到座。但坐車嘅位置的確係先到先得,人哋有權唔讓,唔好覺得所有嘢必需要體諒你有細路或年紀大。都係嗰句,人哋主動幫你係好心地,每個人都應該互相尊重,吓吓要咁霸道,兩個人坐四個位,執紙皮霸一條街,咁仲成世界?
 
羅碧芝 Facebook Page
www.fb.com/gigilawpg
IG: gigilaw1113

COMMENT