2018/01/05

點先知自己有無臭狐

2018-01_05_Gigi MenClub
 
網上資料圖片
 
話說我由細到大個死人鼻真係好靈敏,如果人真係有前世,我應該係隻狗,少少味離幾廿萬丈遠都聞到,例如人哋踩屎企隔離會聞到,邊個有口臭,明明背住都遠距離知邊條友過緊嚟!總知就嗅覺強!
 
咁呢!所以由細到大都好易發現人有臭狐啦,細細個讀書好鬼衰㗎嘛,發現咗實同最friend嗰幾個講,然後背後笑人改吓花名咁囉!咩狐仙、狐人、狐大俠、狐滴哥等等,總知都係笑吓過口癮,但永遠同班朋友正面見到當時人,係提都唔敢提一句。講真,呢類嘢,唔係話俾對方知有條菜喺牙縫咁簡單,挑咗出嚟笑餐死就無事。
 
大佬,臭狐呀!係臭狐,即係細個以為有咗臭狐就無得救,死症,點會有人敢同當時人咁坦白呢?我哋班朋友圍內仲約好,如果發現有一日覺得大家臭或有臭味,點都要同對方講,唔可以扮唔知,因為實在太老尷,唔想自己成為臭狐一份子。
 
如是者咁多年,身邊總有朋友真係有臭狐,我仲要喺運動圈,做運動出汗嘅朋友比較多,可能年紀大咗,都真係會同返年紀較細嘅人好坦白咁講:聞到你個身好臭。但就點都講唔出「你有臭狐」,即係「喂呀,你咁臭嘅個身陣味」,咁開口易少少嘛!講真,當我鼓起勇氣講呢句嘢,諗住對方會get到,原來錯晒。
 
臭狐嘅人係唔知自己有狐味架!佢哋會答你:「係呀,未沖涼呀!汗味嚟!」我心諗係佢怕尷尬定咩呢?咁我都會介紹佢哋用止汗劑或改善飲食,唔食咁多肉陣味應該無咁濃嘅!我無臭狐我真係唔知可以點做。
 
寫咗咁耐,有個方法可以知自己有無臭狐,就係好誠懇咁問吓身邊最熟最賤咀嘅朋友,自己有無狐味,有嘅唔洗怕我嬲,一定要話我知等我去解決!我真係唔知佢哋本身知唔知自己有呢個問題,但避免自己尷尬癌,大家面對現實,試吓問吓都無壞啊XD!
 
羅碧芝 Facebook Page
www.fb.com/gigilawpg
IG: gigilaw1113

COMMENT