2018/01/12

考慮生仔前請三思

2017_01_12_Gigi Menclub
網上資料圖片
 
最近有單新聞,令大部分人特別係為人父母者,都感到好痛心。因為一個五歲嘅小朋友,懷疑被自己嘅親生爸爸同後母虐待至死。雖然唔係發生喺自己身上,但係睇到小朋友咁可愛咁天真嘅模樣,呢一刻已經唔係世界上,個心真係會好唔舒服。
 
我做過小學老師,曾經接觸好多唔同類型嘅家長,例如有類家長就好興咩都唔理,打電話俾佢又話交咗個細路去學校就老師教,咁佢返到屋企都要幫手簽通告同檢查吓功課呀!真係連個小朋友要交費又唔知,要旅行又唔知!仲有好離譜,個學生一年級,校服長期好污糟,原來父母長時間喺大陸做嘢,俾錢請工人就唔理個細路,個工人睬你都傻,將個小朋友搞到成個乞兒咁,唔講真係以為佢日日流浪囉!
 
首先我唔係討論大人有冇做足避孕嘅功夫,我係想討論一個point,就係生個小朋友出嚟,唔係影響你自己人生咁簡單,而係足夠影響小朋友呢一生嘅發展。每次家長日,就會見到唔同類型嘅小朋友,我會諗點解佢哋會有性格上嘅缺陷?好大原因都係要睇返家長本身,有點樣嘅家長就有點嘅小朋友。
 
其實家長本身有冇能力照顧小朋友係第一個問題,包括經濟、時間、同伴侶嘅關係以及家庭環境等等,好多唔同嘅因素。講到明先,離婚嘅家長唔代表就一定冇能力,而係講緊本身嗰個人,有冇一個足夠嘅成熟度去照顧去訓練一個小朋友。
 
如果連最基本自己照顧自己嘅能力都冇嘅時候,講真,學咩人生仔?然後要搞到自己辛苦,個仔又辛苦!最後家不成家,將所有唔開心,自己行條路唔順暢嘅理由放咗落小朋友身上!其實成件事所有嘢都係自己一手一腳搞出嚟,生小朋友係你嘅決定,小朋友係被動,真係出世後,點可以將自己人生好似因為個小朋友嘅出現,打亂咗你陣腳咁。其實係你自己加咗呢一個條件落你人生度,冇可能將責任推卸晒落個小朋友身上,或你伴侶身上。
 
男又好女又好,其中一方反對,就真係諗清楚先好,唔好生咗又推來推去,無人迫你發生性行為,無人迫你生出嚟!生得出就要負責,真係咁唔想面對咪諗方法囉!身邊真係無人幫到手?無論如何都唔可以虐待小朋友囉!
 
我有時真係唔係好明,有班人硬係要虐待殘殺手無寸鐵嘅小動物或者小朋友,究竟呢班人咩心態?咁做有咩好處?大家都希望世界上真係有報應,我只係希望無辜死去嘅小朋友同小動物可以投胎,投到住好人家,下一世唔好再受折磨。
 
至於做壞事嘅人,我相信,終有一日會十倍奉還返出嚟!!
 
羅碧芝 Facebook Page
www.fb.com/gigilawpg
IG: gigilaw1113

COMMENT