2018/01/19

馬拉松迷思

20140216-half-marathon-twogroup-1-s
 
網上資料圖片
 
星期日就跑渣馬,一年一度,年年都見到好多人體力不繼,搞到又傷又盛。傷都係其次,真係搞到有生命危險嘅,每年一定有一兩個。
 
呢個預測係每年渣馬前,無論幾多運動學家或馬拉松高手做幾多宣傳,幾多教育都無辦法避免嘅不幸。原因係,有隱性病嘅人,永遠唔知自己有病,幾時發都唔知。佢亦唔會預測到跑吓步會出事,因為佢開頭心入面都係諗住量力而為,感受吓氣氛,但就係氣氛令人愈跑愈過火,最後就咁無咗條命。
 
其實,跑馬拉松有好多人,每人目標同諗法都唔同,有人係職業跑手,為獎金而跑;有人係本地業餘,但長期接受訓練,為時間而跑。呢兩種跑手一般都唔洗太擔心,訓練有數,心理質素亦好好。
 
最不解係另外兩款人,一係一年有十一個月唔運動,但每次見人報名就唔執輸,死都要爭個位返嚟,到跑期將至先開始係咁易跑吓練吓,呢類人注定受傷多過完成,始終底子有限,唔好話馬拉松,叫佢跑10k都拎佢命。唔付出又想完成,講真邊有咁著數?心肺功能從來未預備好,又何來有個能夠完成賽事嘅引擎呢?
 
不過,我始終最最最討厭係一種人,就係為打卡而打卡,去到跑嘅時候掛住影相,跑跑吓影,唔係完成賽事後去影嚟做個紀念咁簡單呀!呢類人正宗係影完張相去交功課。講真,你影咗張相就好威咩?唔好搞到現場阻塞,構成危險呀!影影影阻住晒,大把人想跑成績,影相返去P圖影飽佢算啦,橫掂都無人睇到你跑晒成段路!
 
如果報咗名,星期日大家會去到跑,無練夠嗰批唔該就量力而為,唔好搞到受晒傷手尾長,到時無人可憐㗎!
 
羅碧芝 Facebook Page
www.fb.com/gigilawpg
IG: gigilaw1113

COMMENT