2018/01/26

你我曾經沉迷嘅漫畫時光

2018_01_26_GigiMenCLub Column
 
2018_01_26_GigiMenCLub Column 2
 
網上資料圖片
 
最近韓國有套電影勁紅,相信大家都知邊套啦!就係「與神同行」啦!睇完後最大感覺都係要孝順父母同埋好驚懶都要落地獄。而我好鍾意睇完一套戲會search佢嘅製作特輯同演員訪問睇。
 
原來呢套韓片係改編自韓國好出名一套叫「與神同行—神的審判」嘅漫畫,即時網上下載睇,真係好正好好睇。到呢一刻韓國官方漫畫平台都仲每日會上載,已去到第三部啦!真係有排煲。
 
講起睇漫畫,自己出嚟社會大學後,放底咗呢個興趣都成十年,因為呢部電影,令我回憶返細個追漫畫嘅年代。嗰種放暑假就去漫畫舖做會員,5蚊租一本,每次租3-4本睇兩日,好驚還書之後接住期數俾人租咗,但一次過租太多又睇唔切,我睇得比較慢同鍾意欣賞畫作,所以好少去漫畫屋,有得任睇有得坐,俾錢睇一日嗰種服務。
 
但有朋友都好鍾意去睇成日,佢哋可以睇一套廿幾集,好勁!我最叻40分鐘一本,慢慢睇,嘆住睇都好輕鬆。睇漫畫最鍾意會不知不覺代入咗漫畫世界,男仔最經典係龍珠同男兒當入樽,迷起上嚟要每期買,捕住佢出嗰日即時去報紙檔買,唔知大家都呢刻,步入中年,仲有無繼續呢個堅持呢?
 
睇開漫畫嘅都知,其實有超多唔出名但都好好睇嘅漫畫,真係睇極都有,呢個青蔥歲月,實在令人超級回味。如果有人質疑我呢個少年回憶,係浪費時間金錢,我會好可憐佢。投入漫畫嘅世界除咗充滿幻想空間外,其實學到好多嘢!試過睇一套講騎馬嘅漫畫,知道咗好多日本賽馬嘅資料,了解馬嘅訓練同特性。
 
如果你哋同我一樣,放底咗漫畫呢個好朋友,可以考慮一下,睇「與神同行—神的審判」呢一套,出到第三部唔洗怕追到會失落,用手機睇又方便,最重要同電影好唔同劇情,真心正,堅推無伏!
 
羅碧芝 Facebook Page
www.fb.com/gigilawpg
IG: gigilaw1113

COMMENT