2018/02/02

帽事嘅!出軌的女人,好易睇之嘛!

2018_01_30_Gigi MenClub
 
網上資料圖片
 
「我的港女老婆」漫畫家宣布同港女老婆離婚,唔再上載呢個系列嘅漫畫。然後好多大大即時神探上身起晒港女老婆呢三個月行蹤,話佢疑似偷食。偷唔偷食都好,跟車太貼唔係我本色,人哋兩個可能有好多故事無喺漫畫呈現出嚟,又或者,漫畫一直劇情虛構,不得而知啦!
 
唔好理人咁多,各位大大有無諗過自己,身邊個老婆/女友俾綠帽自己戴嘅可能?
 
我成日話,女人呃男人係超易,因為大家以為做親衰嘢都係男人居多,而事實上,大把女人一腳踏兩船,亦有女人紅杏出牆。總知聽返來又有,身邊有男性朋友賴嘢又有,有咁做嘅女性朋友都唔少。
 
所以各位男士,唔想個頭有頂綠帽,就要留意吓身邊嗰位嘅日常生活、對你嘅態度同身邊嘅朋友有咩變化。
 
首先,唔好以為你女友係乖乖女,溫文爾雅識煮飯做家務就唔會出軌,出軌係佢情感上行為上同第二個男人一齊,同佢識煮飯係無直接關係囉唔該!試過聽到個男仔話:「我女朋友好好,佢會煮飯俾我食又幫我執屋。」點知最後咪幫第二個執埋屋!男人都低能嘅!執屋又點?鐘點夠識執屋啦!所以,你要了解,一個做足家頭細務嘅女人,絕對係有可能出軌!
 
喂!咁點呀?成個乖乖女咁又話有機會出軌,咁即係外在行為上,的確係參透唔到出軌嘅可能性。(等如呀唐家家暴個唐文龍都係好爸爸,咪又係出軌)。所以,我哋就要留意,你女友會唔會好介意你睇佢手機,手機係超超超重要,女人如非必要有兩部手機或以上,你就要好小心!
 
女人特性係慳,俾兩個月費,用兩部電話係極唔化算,身無屎係好少咁分開嚟用。另外,女人係極重感情嘅動作,一旦愛上新歡,咩短訊,合照等,通通可以喺手機搵到,由於佢無諗過你會搞佢部手機,一般嚟講都好易搵到證據。你可以好簡單拎佢電話過相落電腦,一過就睇晒所有嘢,因為有女性朋友就係咁被踢爆晒,一唔留神就會無所遁形。
 
另外,女人十個有九個都好勝,講嘅係佔有男人嘅慾望,唔俾你同巴打飲酒食飯、唔俾你芒亨,唔俾你出街等等,如果有一日佢突然好大方,叫你去玩去飲酒去打機啦,唔洗理我,我都約咗朋友。咁嘅話,一兩次當然無問題啦!如果長時間持續一個月以上,你就要留意吓佢出親街有無上載相同動態上IG啦!同女仔朋友出街,放上網好正常嘅,但持續咁多次都無對方個樣,又睇戲,又去迪士尼海洋公園呢,你就小心啦!
 
最終極,當然睇吓佢有無突然間成日拎新嘅銀包、電話、電腦、咩都好啦,總知平時唔會自己買嘅嘢返嚟,突然咁多新嘢用,又無同你分享買嘅過程、邊到買、同咩人去買嘅話,你都死咗九成。
 
重有,最不幸嘅係,我發現次次被出軌嘅男人,都係做足100分,乖仔,聽女友話,任勞任怨嘅個批最易出事!各位大大,唔好灰心,如果真係遇上呢種賤女人,你呢世人發現得到都係好事,換個角度都起碼唔洗被騙一世。我真係見過,有男人被人呃咗十幾年都唔知,大家好自為知啦!
 
羅碧芝 Facebook Page
www.fb.com/gigilawpg
IG: gigilaw1113

COMMENT