2018/02/09

出嚟揸車講吓人品好喎

2018_02_08_Gigi MenClub Column
 
網上資料圖片
 
「揸車揸咁快係咪趕住去死?」你哋有無試過講呢句嘢?有無試過揸車時因為其他駕駛人士好賤格,喺一個出面明明聽唔到你講嘢嘅情況下鬧爆討你厭嘅司機?
 
揸車嚟講,從來都有好多學問,唔係你乖乖地遵守晒所有交通規則就必定無事發生。好多突發嘢話嚟就嚟,真係打少12分精神都好易炒到一鑊熟!
 
最近有條片影到架私家車夾硬喺隧道爬頭,搞到架電單車跌低,然後就拍吓屁股繼續扮無嘢開車走咗去!我試過有次二收一,我架車本身係前過隔離成個車位,已經食咗四分一位,只要大家慢慢直行我繼續慢慢收入去就變一條隊,隔離架車唔知係咪痴咗線突然加速,我睇到來勢洶洶只可上咗陰影線。
 
其實條路二收一,係咪都有人先有人後,咩事人哋本身早過你行,又已出咗部份車身,你明明有空間都係要加速唔俾人過。係要迫到人爭少少炒車先安樂,唔緊要,最後出返公路,我排喺佢後面反而有車讓我,佢排頭位就出極都出唔到,睇到都心涼。
 
呢類人揸車真係賤格到爆,講緊個情況係夾硬死去爛去,明明人哋個位前過去,想迫走人嗰種司機,就好似網上條片咁,發咗神經無啦啦要超車,蝦架電單車做咩呢?俾你快過佢,你去到收費咪又要排隊,咪又係要等!你真係唔明佢做咩事無啦啦點解要咁賤格?
 
爬咗人地頭都唔知有咩好處,快一分鐘定兩分鐘?定好威逼人轉錯線或避開你,嚴重嘅搞出人命點算好?做人有少少品德,唔係因為怕俾人影到,而係大家都揸車,都係要去目的地,唔好覺得條路係你大晒先得呀!
 
其實有時都有好嘅巴士或的士司機專登打燈讓車,所以大家唔好一概而論所有職業司機都衰,呢個世界唔同行業都有好人壞人,嗱,你睇,今次教書佬都咁鬼衰格啦!係咪先!
 
大家揸車真係唔好咁衰格,互相禮讓下,揸車都係求方便,真係因為好勝,搞到炒車又報警又落口供又上庭咁,你估好過癮?唔好貪嗰少少時間,搞到一身蟻就最唔抵!
 
羅碧芝 Facebook Page
www.fb.com/gigilawpg
IG: gigilaw1113

COMMENT