2018/02/15

做人可以天真,但唔可以無同情心

2018_02_14_Gigi MenClub Column
網上資料圖片
 
新年前大埔公路發生嚴重交通車禍,透過一單車禍會睇到好多嘢!正常人睇到呢單新聞,第一個反應會好擔心自己屋企人或朋友會唔會喺巴士上面,好怕自己身邊人發生意外,就算明知佢無咩機會喺車上面,都會喺屋企個群組問一問,總知查一查會心定少少。然後你會發現,雖然少咗同家人溝通,但去到一啲生死關頭,你真係會好怕失去佢哋。
 
睇到現場畫面,相信無咩人會覺得個心舒服,會有種心痛嘅感覺,因為好同情失去親人嗰種痛,特別喺新年前,呢種感覺會更加放大。
 
跟手大家會好想幫受傷嘅人,盡力去捐血,唔介意排兩個鐘,籌款都係唔錯選擇,總知幫到人就好。最後,大家會追究呢件上嘅壞角色例如司機同阻礙救援嘅記者們。
 
以上都係一般正常人反應,但從網上留言都可以睇到有人會寫:「點解要取消煙花?係咪要全世界都陪佢哋唔開心?」呢個世界總有人只係關心自己感受,其實唔係要全世界為呢件事唔開心,只係一個尊重,等如球賽開賽前對某些意外或名宿離世進行默哀儀式一樣。
 
好老實,我覺得大家真係唔應該對捐血或捐錢因單一事件突然熱心,其實紅十字都長期話血庫唔夠血,大家應該定期捐血同埋最好登記埋骨髓捐贈計劃。當然因有大型意外,大家咁幫忙係非常好,但如平時都定期幫手補給,香港嘅愛就會更多,亦會幫到更多有血癌嘅病人。講真幫人真係唔係為打卡,變成習慣積到嘅福會更多哦!
 
最後,好想講,即使一分鐘係可以令一個危在旦夕嘅人劃上句號,唔可以用自己嘅判斷,當時架巴士有無人都好,消防員認為要作出任何行動,作為記者都應保持距離,唔可以妨礙任何拯救行動。其實如果真係覺得架巴士無人,仲有必要用嚟做背景進行直播嗎?離遠做直播就輸?我唔係好明,不過算,相信呢位記者都處於好大壓力,希望佢經一事長一智,做人可以天真,但唔可以無同情心。
 
天真地一心專注利用不同方法做好工作,但有時遺忘工作本身嘅意義,究竟完成工作後,真係自己好滿足好瞓得?而唔會覺得原來已背其道而行?真係要好好諗吓將心比己嘅道理,將來有事,無人會有同情心對你。
 
羅碧芝 Facebook Page
www.fb.com/gigilawpg
IG: gigilaw1113

COMMENT