2018/02/23

新年現真身

2018_02_23_Gigi MenClub Column
 
網上資料圖片
 
相信,有好多巴打都唔係好鍾意新年,有人因為新年,儲咗幾廿年批高達、漫畫呀、幾千銀嘅PS4等等,你珍而重之嘅玩意可以俾班過度活躍嘅表弟完全摧毁。睇到張家庭災難照,真係比死重難受。我明㗎,即係如果我所有護膚品呀、名牌包包呀、限量唇膏俾人搞到無咗,我都會發癲都似!
 
不過,可惜你係男人,你控制到邊個上嚟拜年咩你估?其實諗諗吓男人都幾慘,結咗婚嘅,過年又要俾好多錢封利是,未結嘅又要買厚禮上女友度拜年,女友上你度又係你俾錢買賀禮,單身又要俾全村人問候你幾時有拖拍。
 
Anyway,其實寫呢篇嘢唔係想可憐你哋,因為講都多餘,認命啦!喂話說,有無發現新年,有種人平時嘢都唔同你講多句,黑口黑面,就好似樓下個看更,平時鬼死咁串,新年就會對你笑晒口又開門又盛,然後出名難食間餐廳侍應,平時叫又唔彩,新年就鬼死咁好服務。
 
咁呢種情況,大家會唔會俾利是佢哋呢?人哋都係打份工,但講真平時個表現真係好差,呢個有得選擇嘅情況下,相信都有人會唔俾,都無話新年一定要封利是俾人嘅,三九唔識七嘅更加話直行直過就算啦!
 
可惜,如果同一間公司!同一支球隊!同一個機構有所合作嘅人,平時都唔多想同佢講嘢,但俾晒其他人唔通真係淨係唔俾嗰一兩個咩?好難咁做到,最慘佢又厚面皮埋嚟拎,唔俾又唔知點咁!
 
公司或打波,真係十隻手指數唔晒幾廿人,即使一人一封都夠你攞命。真係一個新年都跌咗成皮嘢!跌完仲要無回饋,為咩呢!
 
其實我都唔明,如果平時無計傾,甚至乎去到互相都唔妥大家嘅,都無必要為咗20蚊頂多咪50蚊咁去搵個死對頭拎利是啊!當然可能會覺得拎佢幾廿蚊都心涼,但係俾個個又真係谷鬼氣。平時叫你合作又唔見你對我笑。
 
所以新年最好避年,去旅行玩咗一皮去好過跌俾無謂人呀吓話,當然你要過到你老婆個關啦!佢嫁得出,洗呢少少開心錢派利是都不知幾過癮啊!
 
羅碧芝 Facebook Page
www.fb.com/gigilawpg
IG: gigilaw1113

COMMENT