2018/03/02

一個足球,真係可以改變好多嘢!

2018_03_01_Gigi Menclub
 
我球齡唔算深,得十幾年,你問我咩足球歷史呀、超級退役球星等,關於詳細背景我真係唔多曉。不過自從做咗球證後,去多咗唔同國家,就發現一樣嘢!無論先進國家如德國、日本、韓國等,已發展國家英國又好美國都好,甚至落後國家緬甸或越南,發展中國家北韓,總知無論有錢又好無錢又好!佢哋都會搞足球。
 
一個足球,搞得好,真係可以帶動幾多經濟利益,創造好多就業機會。有長遠嘅眼光,真係唔會只當足球係一項普通運動咁簡單。不如講吓大家都好熟嘅英超,相信有好多人都去過英國睇波,去過奧脫福個球場個tour啦吓!
 
喺球場入面你會留意到極多餐飲服務,隔離嗰棟football hotel又係招待球迷貴賓吹水食嘢!入去睇場波,要請幾多人去做餐飲?個球場咁大,七萬幾個座位,我當三萬人食熱狗哩,一個餐十幾磅即港幣百五蚊到,每場收入都唔係講波飛咁簡單。仲有,球迷買波衫呢?世界各地球迷都唔知成千上萬,一人買一件波衫,嗰個價錢真係天文數字咁計上去。
 
而周邊服務,好似交通方面,英超有專用車隊公司,送球證、重要人物等,旅遊團呀,球會車等等,交通呢一方面又請一班人長期服務。
 
之後仲有球場保安、維修、清潔、草地、導賞人員、手信店等!嘩,我講緊呢個例子都係一個球會咋!每個星期六,英國喺三點就無直播,5-6場波所有球迷入場支持愛隊,成個國家有幾多人因為足球開緊工,分分鐘一星期做一兩日都夠搵食!
 
英國人真係好醒,識用足球去諗到好多生意,其實足球明星,做出嚟,事在人為,不過不得不佩服佢哋當地人對足球嘅熱愛。每個週末花咁多時間支持愛隊,然後講吓落後國家,就算女足比賽,都幾萬人入場支持,你可以話佢哋無咩特別娛樂,但係對個國家忠誠度亦令人驚嘆!即使佢哋好窮,但佢哋因為對足球有所期待,人生都在苦中有樂。
 
近年政府都開始關注足球,亦放咗好多資源,甚至起咗新嘅足球中心,係要時間一步步去搞。但係香港人,有資源放落去又踩,當睇到人哋台灣有進步又唔抵得。去完咁多地方,我發現香港人特別鍾意踩自己人,究竟係咩心態呢?嗰種只為自身利益嘅態度,實在令人感到恐怖。
 
香港呢個金錢王國,搞死自己嘅唔洗人哋出手,我哋會先滅亡因為我哋無人懂得尋找快樂,亦唔再互相欣賞,各樣嘅生活壓力令人透唔到氣,讀書只為成績,工作只為名利。你願意嗎?
 
我好慶幸自己依然透過足球尋找到快樂,其實,足球真係可以改變好多嘢,即使你唔支持本地波,你好睇唔起都好,你都踏入中年啦!不如你唔好掛住做嘢,搵返對白飯魚或波boots出來,約班朋友踢返場波啦!中年危機?踢完場波先算啦!
 
羅碧芝 Facebook Page
www.fb.com/gigilawpg
IG: gigilaw1113

COMMENT