2018/03/09

三年結兩次婚

J1427339125025
 
網上資料圖片
 
我未嫁得出,未有經驗,所以唔係講緊自己,係想講吓身邊識嘅人。現今嘅婚姻,有幾多人結咗婚你係唔知?個個都放上社交平台㗎啦!唔係大排筵席做乜呢?都係想分享開心先啫!
 
好老實,如果你得廿幾歲,你就唔會明,上到三十歲打後,幾多請帖幾多人問你得唔得閒出席婚禮,真係多到你會問問自己,究竟係咪真係咁多朋友。當然,好老友嘅,識咗十幾廿年嗰批死黨,點都要撐啦!人生大事,但係唔係咁熟嘅所謂朋友或同事,你真係唔係好想理佢。
 
仲有一個重點,係你唔睇好呢段婚姻,因為一開始你太了解主角性格,男嘅未定性,女嘅公主癌等等,所有組合加埋,你都知道飲呢餐都嘥氣。喂,你咪咁衰啦,人哋修成正果,可能好恩愛天長地久呢!
 
咪搞笑啦!都唔洗一年,你會發現有料到,首先由日日飛卜艾豬放閃嘅場面,婚後幾個月已開始,女方已放埋怨嘅文字,都未算,寫下嘢呻下係前奏咋,寫寫吓會變咗通告,將所有發生嘅嘢一五一十寫晒出嚟!大家當然食花生啦!食到咁上下,兩個都唔再update任何嘢啦!
 
呢個先兆,真係百睇百中,最後當然就係離婚收場啦!其實都唔明點解要打開肚皮俾人知自己同另一伴嘅狀態,反而由頭到尾唔講嘅人,好多都老夫老妻相當恩愛。兩個人嘅相處,兩個人明咪得囉!寫上網做咩鬼呀?
 
有時都唔係想唔祝福某類朋友嘅婚姻,結得可唔可以諗清楚,最近有朋友講起,身邊又有朋友又結第二次婚,好彩無請大家咋,三年結兩鑊,成班朋友都話想收返佢人情轉頭呀!話晒大家都俾面用時間出席咗一次,咁短時間又離又再結,係,愛情嘅嘢人地唔明,可能你受盡委屈,好可憐又點點點!但都唔好三年結兩次呀!
 
其實都真係唔關人事,不過都諗吓去咗飲嘅親戚朋友感受呀!一係就由頭到尾唔請飲都仲好少少,人哋理得你。幫手搞婚禮嘅兄弟姐妹更O咀,做得兄弟姐妹都係蝕錢幫手,好少人計較嘅!做完一年後話你聽,sorry,你咁辛苦多膠餘的,唔該晒!咁係咪真係激死人先?
 
所以,如果想自己段婚姻保持長長久久,其實一開始諗清楚成世對住呢個人,問下自己得唔得先?有少少猶豫的話,都真係諗清楚呀!唔夠兩年搞到分開,好多人睇你唔起呀!除非你一開頭無曬過命,否則,一定有人落井下石!
 
羅碧芝 Facebook Page
www.fb.com/gigilawpg
IG: gigilaw1113

COMMENT