2018/03/23

打工仔同球證其實無分別

2018_03_23_gigi menclub
 
網上資料圖片
 
香港愈來愈多足球女裁判,作為大師姐真係好開心多咗女仔加入。雖然好開心,但好老實講,未必睇到未來。
 
唔係講緊佢哋唔投入唔認真,而係要堅持足球裁判呢個興趣,特別係女仔真係唔容易,讀書時期做兼職還可以,當出嚟社會做嘢,可能結婚、生仔、職業上未能配合等,就好容易將呢個所謂嘅興趣放低。
 
做裁判要由低做起,當做青年聯賽時可能會受教練或家長不禮貌對待,做到甲乙丙組亦會有球員球會等等球場上壓力,更甚是球場暴力。
 
然後當你捱過一關又一關時,終於有機會上到去,又會因為發揮唔理想而被任何有隻手有支筆有個口嘅人不停謾罵,講嘅說話有幾難聽都可以,因為喺人哋心目中,你做得裁判就要受埋。
 
所以,放棄呢個興趣嘅人,多到數唔到,堅持嘅可能係一年一班入面十隻手指數得晒。我成日覺得痴線嘅人先會繼續做落去,搵到錢咩?唔係呀又,放工練跑上堂好輕鬆咩?你哋班人無屋企架?你有無尊嚴?
 
可能一句說話,就會將一個人堅持多年嘅嘢完全毀滅。
 
「你做好啲咪無事囉!」其實有無一個唔係做裁判嘅人諗過,全世界裁判都俾人鬧,無論乜超物超都好,都間中會有好大爭議嘅判決,個問題沿於呢個工作崗位真係好難做,難係指即使所有嘢正確,都永遠唔會做到所有人嘅100分,而只要有一個犯錯,就會狠狠跌落零分。
 
世上有天才球員,就永遠唔會有天才裁判。唔夠多失敗經驗一定唔會學識處理,而呢個失敗過程係要於好多好多壓力下成長。
 
但一步步上去時,又真係要有痛苦嘅過程,所以,受唔受得住,就要睇個人造化。
 
我無咩望,真心希望更多新嘅裁判繼續發展,盡量搵到開心嘅原因做落去。喺MenClub咁講好似發咗神經咁,其實大家打份工日日被老細鬧嗰時,嗰種無理取鬧嘅煩厭感同做極都無人欣賞嘅空虛感,咪就係同我哋呢班球場上嘅球證一模一樣。
 
講落大家咁相似,入球場睇波時,鬧少兩句,okee?
 
羅碧芝 Facebook Page
www.fb.com/gigilawpg
IG: gigilaw1113

COMMENT