2018/03/29

男人嘅委屈

5o5p000153495pr7o81o
 
網上資料圖片
 
話說早前睇到篇文,話男人對老婆/女友講道理,都係智力有問題嘅!各位巴打有無試過同女人講道理?有邊次你哋會贏?無呀嘛!經過多年嘅失敗,可以總結出,對女人講道理係徒勞無功,更嚴重係有機會損害本身存在嘅利益!
 
嗰篇嘢大概係話女人重感受,對女人講太多道理係無用,最重要明白佢內心點點點!其實,女人唔係唔講道理,只係女人係有佢講無人講!佢嘅道理就係真理。
 
你懂的~come on!講幾個例子回顧一吓你咁多年受嘅屈辱先啦!
 
1.「你老母唔識湊仔,我先係湊仔專家!」
 
話說你呀媽湊到你牛高馬大,唔知點解粒孫出咗世,佢俾意見佢有提議時,你老婆永遠返到屋企就發你爛渣,講到你呀媽好無知,你今時今日可以繼續係人係一個奇蹟!你基本上唔想參與所有關於食咩奶粉用咩尿片嘅討論,睇到佢兩個一人一句你都想開機打就算,你左右做人難都慣,最難頂佢侮辱你呀媽話佢唔識湊仔!變相其實踩緊你一無事處。呢類咁mean嘅女人你同佢講道理,不如你搵支漒水毒啞自己好過,都係唔好,佢講唔到嘢好似世界無咁嘈,所以……!
 
2.「你打機就唔陪我,我打牌就放鬆心情!」
 
佢夠膽死話你打機浪費時間無聊,佢覺得你要放鬆心情係應該對住佢,你所有快樂嘅根源都由佢而起!佢嘅思想係圍住自己轉,由頭到尾都唔會諗吓你最鍾意做嘅事係乜!而佢就可以同八婆姐妹high tea買衫上網訂手飾(重點係你俾錢),煲韓劇煲到涼又唔沖飯又唔煮屋都唔幫手執吓又得,佢約人打通宵牌重要衰到半夜無啦啦打俾你叫你去接佢又可以嘅!你唔洗瞓隨時oncall,佢要你出現你就要出,因為佢個道理係,你愛我就要重視我,放我第一位!得,贏晒!
 
3.「你遲到就無風度,我遲到要扮靚唔想失禮你!」
 
其實遲到有咩所謂,講聲通知聲囉!但你遲一次佢就會無限放大你唔重視佢,扣分,無風度,人哋男友都唔係咁!佢根本都唔知人哋男友有幾咁被迫,如果遲到可能有幾多金錢損失,又或者氹到口水都乾,基本上女人好多道理係公我贏字你輸嘅玩法。除非你好狠心飛咗佢,否則你都要頂硬上!
 
4.「你係男人,你梗係俾大份啦!」
女人嘅道理要你有風度,你俾晒錢擺酒、求婚、買樓、買車最好,因為你係一家之主呀嘛……聲稱係!好似係,但呢個一家之主都無實際話事權,由間屋點佈置到擺酒邊到擺,架車放嘅嘢好似都唔係你安排,你諗諗吓其實都係司機一個,但佢落車無俾錢唔洗講多謝咁上下啦!佢心入面,你嘅價值係乜?講白少少,都係唔好講啦!一陣你入廁所喊無謂啦!返工繼續努力啦!
 
世間上,唔同女人有唔同性格,搵到個同你講道理定歪理嘅人唔重要、只要你比佢更橫蠻,你可能會有一條生路行下,要努力惡過佢,將你嘅歪理變道理,堅持你嘅大男人性格,做一個真正無賴,你就可以將勝局扭轉!
 
不過現實方面,唔係咁多人做到之嘛!
 
羅碧芝 Facebook Page
www.fb.com/gigilawpg
IG: gigilaw1113

COMMENT