2018/04/06

你鍾唔鍾意用電子貨幣消費

Img257835236
 
網上資料圖片
 
我係一個年過三十嘅中女,對於時下最流行嘅電子消費,當然唔執輸都玩埋一份啦!乜pay物pay,有著數重唔download個apps,用盡佢嘅優惠,儲盡所有積分咩!
 
當然有好多朋友重未下載時下最流行嘅apps,同好多朋友講起,佢哋都擔心透過apps消費唔安全啦!怕被盜用同埋過多咗數咁點算,所以基於安全感唔夠嘅情況下,原本好多朋友都無誘因去搞咁多嘢!包括我,用八達通同埋信用卡一嘟,講真快靚正啦,洗鬼又搞咁多登記又盛咩!
 
但人嘅天性,就係貪小便宜,呢幾間公司正正就係知道,香港人安全感唔夠,就用超級吸引嘅優惠去引誘大家去用佢嘅apps去付款,例如國內最興嗰款,全國人民都用,玩法好簡單,透過佢個apps付款就直接連咗落預先登記咗嗰張信用卡度,你會諗,咁做咩唔直接用信用卡?
 
係喇!就係佢夠膽死做到個優惠係買30蚊平10蚊,便利店、餅店、零食店、化妝品店都用到,價值30蚊嘅嘢只要俾20蚊!咁我點解唔用佢先?搵食艱難啊!我哋香港人慳得一蚊得一蚊㗎嘛!咁鬼著數做咩唔用?
 
然後有靚女藝員做代言人嘅apps,又俾勁多優惠券,大佬,家陣食嘢咁貴,有優惠券做咩又唔用呢?去快餐店食嘢平一半啊!
 
好多人話呢類型嘅消費模式,係劣幣驅逐良幣,但八達通面世咁耐,林鄭都話有需要研究吓點優化啦!講真八達通本身一出係贏晒,但停留喺一出嗰個階段好耐,雖然有自動增值,但市面上唔能夠做到各個層面都用到,都幾難普及。重點係八達通做唔到人同人之間就咁過錢,所以先出咗咁多apps,係食完餐飯你pay俾我啦!
 
其實用apps付款有佢唔好處㗎!例如無網絡就開唔到俾錢塞住條隊啦!又或者有機會有交易上嘅mistake。不過我覺得香港都算幾好,有幾間公司競爭,唔似國內全國市民用同一間,私隱度就會由一間公司掌握晒全國市民嘅消費模式同習慣。雖然唔係話做咗衰嘢,但都幾無安全感咁,而公司亦可透過每個人嘅生活習慣同消費紀錄,去針對性作出推廣,變相就有機會令大家洗多咗錢。
 
所以,喺香港嘅好處係,仲有唔同公司俾你選擇,亦有多款模式任君考慮,而我呢類師奶仔,當然會把握所有著數啦!
 
羅碧芝 Facebook Page
www.fb.com/gigilawpg
IG: gigilaw1113

COMMENT