2018/04/13

靚女英超球證嚟港執法

2018_04_13_Gigi Menclub
 
網上資料圖片
 
我3月時第二次過咗去英超交流,講明交流,當然係我去人哋度學嘢,人哋又會過嚟分享經驗啦!其實我哋足球球證界呢邊,近呢幾年都有搞大大小小嘅交流計劃,安排唔同年青新力軍去唔同地方學嘢!有歐洲、土耳其、日本、美國同埋我有份去嘅英國等等,日本都有派返球證嚟做甲組聯賽,互相吸收經驗,呢兩年嚟嘅日本男球證代表本地甲組賽相當有挑戰性,賽後都學到好多處理球證技巧咁話。始終日本球員文化同香港好唔同,球證做成點啲人都唔會點嘈,所以嚟到香港,對佢哋嚟講都幾大挑戰。
 
呢兩年派出嘅兩位日本球證係當地一等裁判,所以嚟到係做甲組賽事。今期嚟港做交流犀利喇!有英國球證界寶貝級人馬,英超唯一女職業助理球證,國際助理球證Sian Massey 親臨香港,人哋喺英國做英超,嚟到香港當然做港超啦!佢嚟會做3場波,分別係:
 
14/4 5:30pm
旺角大球場 港超聯
東方龍獅 vs 理文
 
18/4 8:30pm
石硤尾公園 乙組聯賽
葛士寶朋友 vs 愉園
 
22/4 5:30pm
旺角大球場 菁英盃
傑志 vs 夢想FC
 
點解我會話佢係寶貝級呢?話說我上兩年嗰時去,佢已經獲英女皇頒發MBE,英超個專業裁判部真係當佢係寶,因為女仔做到英超好難,佢仲可以成為職業球證就更加厲害!佢嘅所有同行係男仔,接受男仔體能訓練,超級勁!生完bb都跟得返,令我佩服得五體投地呀!
 
去到英國交流可以結識到佢,成個過程由佢照顧住真係好榮幸,今次佢嚟到我主場當然由我去take care返佢!希望佢適應到我哋嘅天氣,香港對佢嚟講都真係幾熱!
 
大家有時間入場支持吓我嘅好友+偶像啦!邀請到佢嚟,係對裁判界邀請到英超球星嚟嘅同樣級數,佢唔止嚟做波,仲會講吓talk同支持一吓香港女足嘅活動,佢絕對係一個女足模範!唔入場睇都唔知再有無機會,百年難得一遇啊!
 
羅碧芝 Facebook Page
www.fb.com/gigilawpg
IG: gigilaw1113

COMMENT